धनगढी । न्यु एकेडेमीले चण्डिका ग्रुप लिटल फ्लावर प्रिमियर लिग (एलपीएल) क्रिकेटमा विजयी सुरुवात गरेको छ ।
सोमबार भएको खेलमा रोजी बड्स दाङलाई १ सय ५ रनले पराजित गर्दै न्यु एकेडेमीले सुखद सुरुवात गरेको हो ।
संघीय प्रहरी इकाई कार्यालयको खेल मैदानमा पहिले ब्याटिङ गरेको न्यु एकेडेमीले २० ओभरमा ९ विकेट गुमाएर १ सय ७० रन बनायो ।
उसका अंकित बिमले सर्वाधिक ३३ रन बनाए । यस्तै सन्दीप विष्टले ३१ रन जोड्दा सुवास थापाले ३० रन बनाए । कृष्ण भट्टले २० रन जोडे ।
रोजी बड्सका आशिष सुवेदीले ३ विकेट लिए । विजय विश्वकर्मा र युकुब मियाले २/२ विकेट लिए ।
न्यु एकेडेमीले दिएको १ सय ७१ रनको लक्ष्यसहित ब्याटिङ गरेको रोजी बड्स १७ ओभर १ बलमा अलआउट हुँदै ६५ रनमा समेटियो ।
रोजी बड्सका खुम चौधरीले अविजित २० रन बनाए । अन्य खेलाडीले दोहोरो अंक जोड्न सकेनन् ।
न्यु एकेडेमीका सन्दीप विष्टले ३ विकेट लिए । सन्दीप खेलको प्लेयर अफ दि म्याच चुनिए । अनिल थापा र सुवेश रावलले २/२ विकेट लिए ।
शनिबारबाट सुरु प्रतियोगितामा १६ टिमको सहभागिता रहेको छ ।
विजेताले १ लाख २० हजार पाउने छन् ।
त्यस्तै उपविजेताले ६० हजार प्राप्त गर्दा सर्वोत्कृष्ट खेलाडीले १० हजार पाउने छन् ।
उत्कृष्ट ब्याट्सम्यान, बलर र उदयमान खेलाडीले ५/५ हजार पाउने छन् ।
