धनगढी । होलिल्याण्ड स्कुलले चण्डिका ग्रुप लिटल फ्लावर प्रिमियर लिग (एलपीएल) क्रिकेटमा विजयी सुरुवात गरेको छ ।
आइतबार भएको खेलमा स्टेपीङ स्टोनलाई ९ विकेटले पराजित गर्दै होलिल्याण्डले सुखद सुरुवात गरेको हो ।
संघीय प्रहरी इकाई कार्यालयको खेल मैदानमा पहिले ब्याटिङ गरेको स्टेपीङले १५ ओभर ५ बलमा अलआउट हुँदै ८६ रन बनायो ।
उसका अभिषेक कुँवरले सर्वाधिक २६ रन बनाए । आर्यन दानपालीले १३ रन जोड्दा रोमन विस्टले ११ रन बनाए ।
होलिल्याण्डका अशोक धामीले ४ विकेट लिए । श्याम साउदले २ विकेट लिए ।
स्टेपीङले दिएको सामान्य लक्ष्य होलिल्याण्डले ८ ओभर २ बलमा १ विकेट गुमाएर पुरा गर्यो ।
होलिल्याण्डका लागि गौरव सिंह रावतले अविजित रहदै ५५ रन बनाए ।
सुनिल चन्दले १७ रन जोड्दा मनोज ओझाले ११ रन बनाए ।
खेलमा अशोक धामी प्लेयर अफ दि म्याच चुनिए ।
शनिबारबाट सुरु प्रतियोगितामा १६ टिमको सहभागिता रहेको छ ।
विजेताले १ लाख २० हजार पाउने छन् ।
त्यस्तै उपविजेताले ६० हजार प्राप्त गर्दा सर्वोत्कृष्ट खेलाडीले १० हजार पाउने छन् ।
उत्कृष्ट ब्याट्सम्यान, बलर र उदयमान खेलाडीले ५/५ हजार पाउने छन् ।
