दमक र माङसेबुङको विजयी सुरुवात

इलाम । ११ औ संस्करणको पवित्रहाङ्मा कप अन्तरगत महिला फुटबलमा रोयल स्पाेर्टिङ क्लब दमक र एपिएससी माङ्सेबुङले विजयी सुरुवात गरेका छन् ।

किरात धर्मगुरुआमा साँवा पवित्रहाङ्मा लिङदेनको ६५ औं जन्मोत्सवको अवसरमा आत्मानन्द खेल मैदानमा सुरु भएको प्रतियोगिताको उद्धघाटन खेलमा दमकले चुलाचुली गाउँपालिका खेलकुद विकास समितिको चुनौती ३–१ ले पन्छाएकाे हाे । 

दमकको जितमा दिया शाहीले २ र दिव्या मगरले १ गोलको योगदान दिइन् । खेलको २१ औ मिनेटमा दियाले दमकलाई सुरुवाती अग्रता दिलाएकी थिइन् ।

पहिलो हाफमा एक गोलको अग्रता बनाएको दमकले दोश्रो हाफमा थप गोल गर्याे । ३८ औ मिनेटमा दिव्याले अग्रता दोब्बर बनाइन् ।

खेलको ५१ औ मिनेटमा चुलाचुलीकी एलिना मगरले अग्रता घटाएकी थिइन्। पुन दियाले ५६ औ मिनेटमा गोल गरेपछि दमक ३–१ गोल अन्तरको जित निकाल्दै सेमीफाइनल पुग्न सफल रह्यो ।

खेलको प्लेयर अफ दि वुमन दिया घोषित भइन् ।

बिहिबारनै भएको अर्को खेलमा माङसेबुङले पञ्चकन्या एफ सी उदयपुरलाई ४–० गोल अन्तरले हरायो । माङ्सेबुङको जीतमा सबै गाेल लक्ष्मी ठटालले गरिन् । उनले खेलको छैटाै‌, ११, २७ र ४३ औ मिनेटमा गोल गरेकी थिइन् ।

गोलकर्ता लक्ष्मी प्लेयर अफ दि वुमन घोषित भइन् ।

प्रतियोगिता अन्तरगत शुक्रबार दुई खेल हुनेछ ।

पहिलो खेल धरान फुटबल क्लब सुनसरी र खदम स्पाेर्टिङ क्लब मोरङबीच प्रतिस्पर्धा हुनेछ ।

दोश्रो खेल सातिसाले एफसी मोरङ र माउण्ट एभरेष्ट स्पोर्टिङ क्लब चतरा सुनसरीबीच हुने तय भएको छ ।

प्रतियाेगिताकाे विजेताले नगद १ लाख एक सय ६५ रुपैयाँ र उपविजेता टिमले नगद ५० हजार एक सय ६५ रुपैयाँसहित ट्रफी, मेडल र प्रमाणपत्र पाउनेछन् ।

सर्वाधिक गोलकर्ता, उत्कृष्ट खेलाडी, उत्कृष्ट डिफेन्डर र उत्कृष्ट गोलकिपरले जनही तीन हजार एक सय ६५ रुपैयाँ प्राप्त गर्नेछन् ।

आत्मा पवित्र हक्चात यक्चुम माङसेबुङ इलामको आयोजनामा सुरु भएको प्रतियोगितामा इलाम, झापा, मोरङ, सुनसरी र उदयपुर गरी ८ महिला टिमले सहभागीता जनाएका छन् ।

प्रतियोगिताको फाइनल फागुन २ गते हुनेछ ।