एजेन्सी । पुर्व विश्व नम्बर एक स्विस खेलाडी रोजर फेडेरर जर्मनीमा जारी मर्सिडिज कप टेनिसको फाइनलमा प्रवेश गरेका छन् । शनिबार भएको सेमिफाइनलमा अष्ट्रेलिया निक क्य्रीगियोसलाई हराउदै फेडेरर उपाधि नजिक पुगेका हुन् ।
प्रतिस्प्रधात्मक बनेको खेलमा पहिलो सेट गुमाए पनि फेडेररले उत्कृष्ट पुनरागमन गर्दै खेल जितेका हुन् । फेडेररले क्य्रीगियोसमाथि ६-७(२-७), ६-२ र ७-६(७-५) को संघर्षपूर्ण जित निकालेका हुन् ।
झन्डै साढे दुई महिना टेनिस कोर्टबाहिर रहेका फेडेरर पहिलो सहभागितामै फाइनल पुगेका हुन् । २० पटकको ग्राण्डस्लाम विजेता फेडेरर गत मार्चपछि पहिलोपटक कोर्टमा फर्किएका हुन् ।
अब फेडेररले फाइनलमा क्यानाडाका मिलोस राओनिकसँग खेल्ने छन् । राओनिकले साविकको विजेता लुकास पौइल्लेलाई ६-४ र ७-६(७-३) ले हराए ।
मर्सिडिज कपको फाइनल प्रवेश गरेसँगै ३६ बर्षीय फेडेरर टेनिसको विश्व वरियताको शीर्ष स्थानमा फर्किएका छन् । यसअघि विश्व नम्बर एक बन्न एक जित आवश्यक रहेका फेडेरर सोमबार निस्कने वरियताको शीर्ष स्थानमा हुनेछन् ।
