'नेपाललाई इतिहास रच्ने अवसर'

ढाका । दक्षिण एसियाली राष्ट्रको फुटबल स्तर समान मानिन्छ । यी राष्ट्रबीचको फुटबल अन्तर धेरै फरक पाइन्न ।

पछिल्लो समय भारतले अन्य राष्ट्रको तुलनामा धेरै सुधार गरेको छ । अर्थात् भारतले फुटबलमा एक प्रकारको छलाङ नै मारेको छ । त्यसको मापन हो, 'साफ च्याम्पियनसिप' ।

दक्षिण एसियाली राष्ट्रको लागि साफ च्याम्पियनसिप 'विश्वकप' जस्तै हो । र, साफमा भारतले जति अन्य राष्ट्रले उपाधि जित्न सकेको छैन । उपाधिमा अन्य राष्ट्र भारत नजिक पुग्नै सकेको छैन । साफमा भारतले मात्र ७ पटक कब्जा जमाईसकेको छ ।

नेपाल साफ फुटबलमा सधै दाबेदार राष्ट्र मानिन्छ । तर, नतिजा सधै त्यसको विपरित आउने गर्छ । नेपालले साफ च्याम्पियनसिपको उपाधि जित्न सकेको छैन । उपाधि मात्र हैन साफको ११ औं संस्करण सकिदा सेमिफाइनलको यात्रा गर्नु नै नेपालको ठुलो उपलब्धि रहेको छ ।

यस्तोमा बंगलादेशको ढाकामा जारी १२ औं साफ च्याम्पियनसिपमा नेपालले सेमिफाइनलमा स्थान बनाएको छ । नेपालको यो चौथो सेमिफाइनल यात्रा हो । र, पहिलो सेमिफाइनलमा नेपालले बुधबार माल्दिभ्ससंग खेल्दैछ ।

बंगबन्धु रंगशालामा बुधबार माल्दिभ्सविरुद्ध मैदान उत्रदा नेपाली फुटबलका लागि ऐतिहासिक दिन बन्न सक्नेछ । माल्दिभ्सविरुद्ध जित हात पारे साफको इतिहासमा नेपालले पहिलोपटक फाइनलमा स्थान बनाउनेछ । तर, त्यसका लागि नेपालले आफुलाई प्रमाणित गर्नुपर्ने हुन्छ ।

'मेरो टिम, खेलाडीको ध्यान भोलिको सेमिफाइनल खेलमा छ । भोलि सारा नेपालीलाई खुसी दिलाउने छौं,' माल्दिभ्ससंगको खेलअघि राष्ट्रिय टोलीका प्रशिक्षक बाल गोपाल महर्जन आत्मविश्वासी देखिए । उनले भने, 'अहिलेसम्म हात पार्न नसकेको सफलता भोली हात पार्नेछौं ।'

प्रशिक्षक महर्जन आत्मविश्वासी देखिनुको कारण थियो - नेपाली टोलीले समूह चरणमा गरेको प्रदर्शन । समूह चरणमा नेपालले आफुलाई प्रमाणित गरेको थियो । पहिलो खेलमा पराजयको बाबजुत लगातार दुई खेल जित्दै नेपालले सेमिफाइनलमा स्थान बनाएको सफल भएको थियो ।

पहिलो खेलमा नेपाल पाकिस्तानसंग २ – १ ले पराजित भएको थियो । तर, भुटानलाई ४ – ० र बंगलादेशलाई २ – ० ले हराएर नेपाल समूह विजेता बनेको थियो । जुन पुनरागमन सफलता नेपाली फुटबलले कमै प्राप्त गर्ने गर्छन् ।

समूह चरणको प्रदर्शनले हौसिएको नेपाल माल्दिभ्स विरुद्ध आफ्नो लयलाई कायम राख्न चाहन्छ । तर, नेपाललाई सहज भने पक्कै हुनेछैन । साफको इतिहासले त्यसै भन्छ ।

साफ च्याम्पियनसिपमा नेपालले माल्दिभ्सविरुद्ध खराब इतिहास बनाएको छ ।  नेपालले साफमा हराउन नसकेको राष्ट्र हो माल्दिभ्स । तर, पछिल्लो समय माल्दिभ्सको फुटबल निकै खस्किएको छ । समूह चरणको प्रदर्शन समेत माल्दिभ्सको उच्च देखिएको थिएन् ।

समग्रमा हेर्दा पनि नेपाल माल्दिभ्सविरुद्ध जित कम हार बढीको स्थितिमा रहेको छ ।  नेपालले हालसम्म माल्दिभ्सविरुद्ध १५ खेल खेलेको छ । जसमा ४ जित र ४ बराबरी खेल्दा नेपालले ७ खेल गुमाएको छ । नेपालले समग्रमा माल्दिभ्सविरुद्ध १९ गोल गर्दा २० गोल खाएको छ ।

यस्तै साफमा नेपालले माल्दिभ्ससंग ६ खेल खेलेको छ । जसमा नेपालले २ बराबरी खेल्दा ४ हार बेहोरेको छ । नेपालले साफमा माल्दिभ्सविरुद्ध ७ गोल गर्दा १४ गोल खाएको छ ।

तर, नेपाली टोलीका प्रशिक्षक महर्जन पुरानो इतिहास नहेर्ने पक्षमा छन् । प्रशिक्षक महर्जन नयाँ इतिहास बनाउन चाहन्छन् । नेपाल माल्दिभ्सविरुद्धको जितबिहिन यात्राको अन्त्य गर्ने लक्ष्यमा हुनेछ ।

सन् २०१६ को बंगबन्धु गोल्डकपलाई लक्षित गर्दै प्रशिक्षक महर्जनले भने 'विगतको नतिजा के भयो, त्यसमा नजाउ । पछिल्लो समय हामी माल्दिभ्समाथि हाबी छौं । हामीले पछिल्लो दुई बर्षको नतिजामा ध्यान दिनुपर्छ ।'

नेपालले माल्दिभ्सलाई पछिल्लो पटक बंगबन्धु गोल्डकपमा ४ – १ ले हराएको थियो । नेपालले बुधबार प्रतिस्पर्धा गर्ने मैदानमै माल्दिभ्सलाई हराएको थियो । नेपालका नवयुग श्रेष्ठले ह्याट्रिक गरेका थिए भने विशाल राईको नाममा एक गोल रहेको थियो । त्यसबेला नेपालले उपाधि नै जितेको थियो ।

नेपाल बुधबार दुई बर्षअघिको नतिजा कायम राख्ने लक्ष्यमा हुनेछ । नेपाल आफुलाई प्रमाणित गर्न चाहन्छ । नेपाल एक नयाँ इतिहास कोर्न चाहन्छ ।