भारतको मध्यम सुरुवात

एजेन्सी । अष्ट्रेलियाविरुद्धको तेस्रो टेस्टको पहिलो इनिङ्समा भारतले मध्यम सुरुवात गरेको छ ।

सिड्नीमा अष्ट्रेलियालाई शुक्रबार अलआउट गर्दै पहिलो इनिङ्स थालेको भारतले दोस्रो दिनको खेल सकिदा २ विकेट गुमाएर ९६ रन बनाएको छ ।

भारतका शुबमन गिलले ५० रनको अर्धशतकीय इनिङ्स खेल्दा रोहित शर्माले २६ रन बनाए ।

चेतेश्वर पुजारा ९ र कप्तान अजिन्का रहने ५ रनमा अविजित रहेका छन् ।

पहिलो इनिङ्समा भारत २ सय ४२ रनले पछाडी रहेको छ ।

अष्ट्रेलियाका जोश हाजलउड र पाट कुमिन्सले १/१ विकेट लिए ।

यस अघि पहिले ब्याटिङ गरेको अष्ट्रेलियाले अलआउट हुँदै ३ सय ३८ रन बनाएको थियो ।

१ सय ६६ रनमा २ विकेट गुमाएर दोस्रो दिनको खेल थालेको अष्ट्रेलियाले १ सय ७२ रन जोड्न बाँकी विकेट गुमाएको हो ।

घरेलु टोलीका लागि स्टेभन स्मिथले १ सय ३१ रनको शतकिय इनिङ्स पुरा गरे । रबिन्द्र जडेजाबाट बोल्ड हुनु अघि स्मिथले १६ चौकाको मदतले अष्ट्रेलियालाई बलियो अवस्थामा पुर्याएका थिए ।

ओपनर विल पोकोवस्कीले ६२ रन बनाएको ईनिङ्समा मार्नस लाबुस्चगने शतक बनाउन ९ रनले चुके । उनलाई जडेजाले आजिक्या रहाणेको हातबाट क्याच आउट गराए । अन्य ब्याट्सम्यान खासै चल्न सकेनन् ।

भारतका जडेजाले ४ तथा जस्प्रित बुम्राहा र नाभदीप शैनीले २/२ विकेट लिए । मोहमद सिराजको नाममा एक विकेट रह्यो ।

आईसीसी विश्व टेस्ट च्याम्पियनसिप अन्तर्गतको ४ खेलको सिरिज १-१ को बराबरीमा रहेको छ ।

पहिलो टेस्ट अष्ट्रेलियाले ८ विकेटले जितेको थियो । यस्तै दोस्रो टेस्ट भारतले ८ विकेटले नै आफ्नो बनाएको थियो ।