काठमाडौँ । प्रधानमन्त्री कप (पीएम कप) राष्ट्रिय महिला क्रिकेट प्रतियोगितामा विभागिय टिम एपीएफ समुह विजेता बन्दै सेमिफाइनल प्रवेश गरेको छ ।
लुम्बिनी प्रदेशलाई ६१ रनले पराजित गर्दै एपीएफ समुह विजेता बनेको हो ।
१ सय २३ रनको लक्ष्य पछ्याएको लुम्बिनीले ७ विकेट गुमाएर मात्र ६१ रन बनाउन सक्यो ।
लुम्बिनीकी लक्ष्मी चौधरीले सर्वाधिक ११ रन तथा सरस्वती पुनले अविजित १० रन बनाउनु बाहेक अन्य खेलाडीले दोहोरो अंक जोड्न सकेनन्।
एपीएफकाे जितमा करुणा भण्डारीले ३ विकेट लिइन् । यस्तै रेखा रावल र सोनु खड्काले समान १-१ विकेट हात पारे ।
यसअघि टस जितेर पहिले ब्याटिङ गरेको एपीएफले निर्धारित २० ओभरमा ४ विकेट गुमाएर १ सय २२ रन बनायो ।
उसका विकेटकिपर ज्योती पाण्डेले सर्वाधिक ४९ रन बनाइन् । ५४ बल खेल्दै १ चौका प्रहार गरेकी पाण्डे नेरी थापाको बलमा बोल्ड हुँदा अर्धशतकबाट चुकिन् ।
एपीएफकी इन्दु वर्माले २८, राजमती एरीले ११ तथा सरिता मगरले १० रनको योगदान दिए ।
लुम्बिनीको कप्तान नेरी थापाले २ विकेट हात पारिन् ।
मंगलबारबाट समुह बीका खेलहरु सुरु हुनेछ ।
समुह ए मा एपीएफ, प्रदेश २, कर्णाली प्रदेश र लुम्बिनी प्रदेश रहेका छन् ।
यस्तै समुह बीमा सुदुरपस्चिम प्रदेश, बागमती प्रदेश, गण्डकी प्रदेश र प्रदेश १ रहेका छन् ।
