नेपालको जितका नायक सुनिल भन्छन्, 'पहिलो रोजाईमा पर्दा आश्चर्यमा परे'

ढाका । बंगलादेशको ढाकामा जारी साफ च्याम्पियनसिपमा बिहिबार नेपालले भुटानविरुद्ध सानदार जित निकाल्यो ।

बंगबन्धु रंगशालामा नेपालले भुटानलाई ४ – ० ले हराउन सफल भएको थियो । र, समूह 'ए' मा रहेको नेपालले समूह चरणमा पहिलो जित निकाल्न सफल भयो ।  

भुटानविरुद्धको जितमा नेपालका एक खेलाडी नायक थिए । जसले नेपाली टोलीबाट पहिलोपटक पहिलो रोजाईमा पर्दै मैदान उत्रिएका थिए । नेपाली सिनियर टोलीबाट दोस्रो पटक मैदान उत्रदै थिए । उनी थिए २० बर्षीय मिडफिल्डर सुनिल बल ।

प्ले मेकर सुनिलकै प्रदर्शनमा नेपालले भुटानलाई सहजै हराएको थियो । र, नेपाल भुटानविरुद्ध पुनः अपराजित रहन सफल भयो । भुटानविरुद्ध सुनिलले गोल महत्वपूर्ण एक गोल गरेका थिए । यस्तै नेपालले गरेको चार गोलमध्ये उनले २ गोलको लागि पास उपलब्ध गराएका थिए ।

सुनिलले पहिलो गोल (अनन्त तामाङ) र चौथो गोल (निराजन खड्का) को गोलका लागि कर्नरबाट पास उपलब्ध गराएका थिए । यस्तै ७१ औं मिनेटमा विमल घर्ति मगरले प्रहार गरेको पेनाल्टीको रिबाउन्ड बलमा सुनिलले गोल गरेका थिए ।

सुनिलकै प्रेरणादायी प्रदर्शनमा नेपालले साफ च्याम्पियनसिपको दोस्रो चरणमा पुग्ने बलियो सम्भावना कायम राख्न सफल भएको छ । नेपालले महत्वपूर्ण ३ अंक जोड्न सफल भएको छ ।

ललितपुरे क्लब थ्री स्टारबाट क्लब फुटबल खेल्दै आएका सुनिल उमेर समूहबाट आएका खेलाडी हुन् । हेटौडाका सुनिलले उमेर समूहको अधिकास प्रतियोगितामा उच्च प्रदर्शन गरिसकेका छन् ।

एन्फा एकेडमीबाट उत्पादित सुनिलले सन् २०१६ मा नेपाली टोलीमा डेब्यु गरेका थिए । लाओसविरुद्धको मैत्रीपूर्ण खेलमा डेब्यु गरेका सुनिल एसियन गेम्सको लागि नेपाली टोलीमा समेत रहेका थिए ।

एसियन गेम्सको प्रदर्शनले सुनिल साफको लागि नेपालीमा टोलीमा स्थान बनाउन सफल भएका थिए । तर, सुनिललाई भुटानविरुद्धको खेलमा पहिलो रोजाईमा पर्छु भन्ने कहिले नसोचेको बताए ।

भुटानविरुद्धको प्लेईङ ११ आउदा आफ्नो देख्दा अचम्म लागेको सुनिलले बताए । पहिलोपटक नेपाली टोलीमा पहिलो रोजाईमा परेकै दिन उत्कृष्ट प्रदर्शन गरेपछि सुनिलले के के भने ?

सुनिलको भनाई उनकै शब्दमा :  

पहिलो पटक राष्ट्रिय टोलीको सुरुवाती प्लेईङ सेटमा खेल्न पाएको यो मेरो पहिलो अवसर हो ।

मलाई विश्वास गरेर प्रशिक्षकले टिम सेटमा राख्नु भयो । मैले आफ्नो १०० प्रतिशत दिन कोशिस गरे । मैले सकेको खेले जस्तो लाग्छ । राष्ट्रिय टोलीबाट पहिलो गोल गर्दा धेरै खुसी लागेको छ ।

पहिले मलाई पहिलो रोजाईमा पर्छु भन्ने थाहा थिएन । मिटिङ हुँदा मेरो नाम दिनु भयो । म सरप्राइज भए । मैले मनमनै सोचे आज राम्रो खेल्नु पर्छ शतप्रतिशत दिनु पर्छ ।

सिनियर दाईहरुले धेरै प्रेरणा दिनु हुन्छ । भाईहरु राम्रो खेल्नु पर्छ, तिमीहरु नै हो अबको खेलाडी भन्ने गर्नुहुन्छ ।

मलाई अझै नेपालको टिमबाट खेल्ने मन छ ।  नेपाली फुटबललाई अझै माथि लैजाने मन छ ।