एजेन्सी । भारतीय फ्रेन्चाइज लिग इण्डियन प्रिमियर लिग (आईपीएल) सेप्टेम्बरबाट सुरु हुँदैछ ।
कोरोना भाईरसको महामारीको कारण भारतमा आयोजना सम्भव नभएपछी प्रतियोगिता दुबईमा आयोजना हुँदैछ ।
१३ औं संस्करणको आईपीएलमा सहभागिता जनाउन फ्रेन्चाइज टिमहरु दुबई पुग्ने क्रम जारि छ । दुबई पुगेपछि टिमले कम्तिमा ६ दिनको क्वारेन्टिन बस्नु पर्नेछ ।
यद्दपी सेप्टेम्बर १९ बाट सुरु हुने प्रतियोगिताको खेल तालिका भने अझै सार्वजनिक भएको छैन ।
मुम्बई इण्डियन्सका कप्तान रोहित शर्माले समेत प्रतियोगिताको खेल तालिका सार्वजनिक नभएको भन्दै चासो देखाएका छन् ।
शर्माले सामाजिक संजालमा महेन्द्र सिंह धोनीको सन्यासलाई बधाई दिदै सेप्टेम्बर १९ को टसमा भेट्ने बाचा समेत गरेका छन् ।
आईपीएलको खेल तालिका सार्वजनिक नभएपनि उद्घाटन खेलमा साविकको विजेता मुम्बईले उपविजेता धोनीको टिम चेन्नई सुपर किंग्ससँग खेल्नेछ ।
आईपीएलको खेल तालिका सार्वजनिक नहुनुको कारण 'डाइनामिक' तालिका रहेको बताइएको छ । महामारीको अवस्थालाई मध्यनजर गर्दै सबैको सुरक्षालाई र क्रिकेट प्रोटोकल अनुसार 'डाइनामिक' तालिका सार्वजनिक गर्ने भारतीय क्रिकेट बोर्डको लक्ष्य रहेको छ ।
भारतीय खेलाडीहरु समेटेर फ्रेन्चाइज टिम दुबई पुग्दै गर्दा विदेशी खेलाडी भने त्यहिँ टिमसँग सामेल हुने छन् । थुप्रै राष्ट्रमा हवाई उडान बन्द रहेको कारण विदेशी खेलाडी समयमा आइनपुग्ने सम्भावना रहेको छ ।
अष्ट्रेलिया र इंग्ल्यान्डका खेलाडीहरु सेप्टेम्बर १७ र १८ मा दुबई आईपुग्ने छन् । दुबई आएपछि उनीहरु क्वारेन्टिनमा बस्ने छन् ।
विदेशी खेलाडी नहुँदा कतिपय टिमको खेलमा असर पर्ने देखिन्छ ।
त्यसैले सुरुवाती चरणको खेलहरुमा युरोप हुँदै आउने खेलाडीको बाहुल्यता नभएको टिमको खेल राखिने स्रोतले बताएको छ ।
'प्रतियोगिताको ३-४ दिनको खेलमा युके हुँदै आउने खेलाडी कम भएको टिमको राखिने छ,' स्रोतले टाईम्स अफ इण्डियालाई भनेको छ ।
यस्तै, प्रतियोगिता दौरान खेलाडीमा कोरोना संक्रमण भेटिए खेलाडीलाई १४ दिनको आइसोलेसनमा राखिने छ ।
यस्तै संक्रमित खेलाडीको टिमका सबैलाई ६ दिनको क्वारेन्टिन अनिवार्य हुन्छ ।
क्वारेन्टिन र आइसोलेसनपछी खेलाडीको ३ पटक पीसीआर टेस्ट गरिने छ । तर, यस समयमा प्रतियोगिता नरोकिने गरि तालिका 'डाइनामिक' बनाउन लागिएको हो ।
'यदी त्यसो भयो भने, त्यो टिमले ६ दिन सम्म खेल खेल्न पाउने छैन । तर प्रतियोगिता भने चलिरहन्छ,' स्रोतले भनेका छन्, 'त्यसैले सम्भब भएसम्म लचिलो तालिका बनाउनेमा काम भईरहेको छ । जसले गर्दा आवश्यक्ता अनुसार खेल रोक्ने र पछी धकेलिन सकिने छ ।'
'प्रतियोगितामा दोस्रो हप्ता निकै महत्वपूर्ण हुनेछ । किनकि तेस्रो हप्ता देखी टिमहरु प्लेअफको लागि लडाई गर्ने छन् । त्यसैले दोस्रो हप्ताको खेल तालिकामा लचकता आउनुपर्ने छ ।' स्रोतले थपे ।
यस्तै आयोजकले आईपीएलको तालिका यसै साता सार्वजनिक गर्ने योजना बनाएको छ । खेल तालिका सार्वजनिक भएपछी मात्र म्याच अफिसियल, टिभी क्रु, कमेन्टेटर र एनालिस्टहरु दुबई भ्रमणमा निस्कने छन् ।
-1736559847.jpg)
