काठमाडौं । नेपाल क्रिकेट संघ (क्यान) ले राष्ट्रिय पुरुष क्रिकेट टिमका खेलाडीको कोरोना बीमा गरेको छ ।
क्यानले २३ खेलाडीसहित ५१ जनाको कोरोना बीमा गरिएको जनाएको छ ।
क्यानले खेलाडीसँगै कीर्तिपुरस्थित त्रिवि मैदानका १६, मुलपानी क्रिकेट मैदानका ६ र क्यान अफिसमा कार्यरत ६ कर्मचारीको बीमा गरेको हो ।
विश्वभर महामारीको रूपमा फैलिएको कोरोना भाईरसको संक्रमण नेपालमा समेत वृद्धि हुँदै गएपछि क्यानले खेलाडी र कर्मचारीको बीमा गरिएको क्यानका कोषाध्यक्ष रोशन सिंहले जानकारी गराए ।
'पहिलो चरणमा पुरुष खेलाडी, अफिस कर्मचारी र मैदानका कर्मचारीको कोरोना बीमा गरिएको छ,' सिंहले भने, '२३ जना खेलाडी त्रिवि मैदान, मुलपानी मैदान र क्यान अफिसका कर्मचारी गरी कुल ५१ जनाको कोरोना बीमा गरेका छौँ ।'
यस्तै दोस्रो चरणमा महिला खेलाडीको कोरोना बीमा गरिने क्यानले जनाएको छ । त्यसको लागि क्यानले महिला खेलाडीको आवश्यक कागजात जुटाउन समेत सुरु गरिसकेको छ ।
'दोस्रो चरणमा महिला खेलाडीको बीमा हुनेछ । सबै डकुमेन्ट उपलब्ध नभएको कारण महिला खेलाडीको बीमा दोस्रो चरणमा हुने भएको हो । केही दिनमा नै महिलाको समेत कोरोना बीमा हुन्छ,' सिंहले थपे ।
कोरोनाको कारण लामो समयबाट क्रिकेट खेलाडीहरुले प्रशिक्षण गर्न पाएका छैनन् । क्यानले भदौ १ गतेबाट गर्ने भनिएको राष्ट्रिय टिमको प्रशिक्षण समेत स्थगित गरिसकेको छ ।
यस्तै कोरोनाको संक्रमण बढेपछि राष्ट्रिय खेलकुद परिसद (राखेप) ले सम्पूर्ण खेलकुद गतिविधि अनिश्चितकालका लागि बन्द गरिसकेको छ ।
-1736559847.jpg)
