काठमाडौं । सायद, सपना नदेख्ने को होला र ? धेरैले सपना देखेका हुन्छन्, सपना बोकेका हुन्छन् ।
कतिको सपना पुरा हुन्छ, कतिको अधुरै रहन्छ ।
नेपाली क्रिकेटले पनि एक सपना देखेको थियो । जुन, दुई वर्ष अघि पुरा भएको थियो ।
सन् २०१८ को अगस्ट १ मा नेपालले इतिहासमै पहिलोपटक एकदिवसीय अन्तर्राष्ट्रिय क्रिकेट खेलेको थियो ।
एमस्ट्राडममा नेदरल्यान्ड्ससँगको खेलसँगै नेपाली क्रिकेटले २२ वर्षअघि देखेको एकदिवसीय अन्तर्राष्ट्रिय मान्यता राष्ट्र बन्ने सपना पुरा गरेको थियो ।
त्यहिँ वर्ष जिम्बावेमा भएको विश्वकप छनोटबाट नेपालले अन्तर्राष्ट्रिय क्रिकेट परिषद (आइसीसी) बाट एकदिवसीय अन्तर्राष्ट्रिय राष्ट्रको मान्यता पाएको थियो ।
जुलाईबाट एकदिवसीय मान्यता पाएको नेपालले एक महिनापछि नै पहिलो डेब्यु खेलेको थियो ।
ऐतिहासिक दुई खेलको सिरिजका लागि नेदरल्यान्ड्स पुगेको नेपाली टोलीले डेब्यु खेलमा भने ५५ रनले पराजित भएको थियो ।
तर, त्यसको दुई दिनपछि अगस्ट ३ अर्थात् आजकै दिन नेपालले ऐतिहासिक जित निकालेको थियो ।
नेदरल्यान्ड्सविरुद्धको दोस्रो खेलमा १ रनको रोमान्चक जित निकाल्दै नेपालले पहिलो एकदिवसीय अन्तर्राष्ट्रिय जित निकालेको थियो ।
त्यससँगै दुई खेलको सिरिज १-१ को बराबरी भएको थियो । त्यसयता नेपालले हालसम्म कुल १० एकदिवसीय अन्तर्राष्ट्रिय खेलिसकेको छ ।
अन्तिम बलमा पाएको त्यो जित -
नेदरल्यान्ड्सको भिआरए मैदानमा नेपालले घरेलु टोलीलाई जितका लागि २ सय १७ रनको लक्ष्य दिएको थियो ।
टस जितेर पहिले ब्याटिङ गरेको नेपालले ४८ ओभर ५ बलमा अलआउट हुँदै २ सय १६ रन बनाएको थियो ।
खराब सुरुवात गरेको नेपालले २० ओभर भित्र ८८ रन बनाएर ५ विकेट गुमाईसकेको थियो । तर, तत्कालिन कप्तान पारस खड्का र सोमपाल कामीले अर्धशतकीय इनिङ्स खेल्दै नेपालको स्कोर उकासेका थिए ।
एकदिवसीय अन्तर्राष्ट्रिय क्रिकेटमा नेपालको लागि अर्धशतक बनाउने दोस्रो खेलाडी बनेका कप्तान पारसले ६९ बलमा ५१ रन जोडे ।
यस्तै अर्धशतक बनाउने तेस्रो नेपाली खेलाडी बनेका सोमपालले ४६ बलमा ६१ रनको अर्धशतकीय इनिङ्स खेलेका थिए । निकै आक्रामक ब्याटिङ गरेका उनले पाँच चौका र ६ छक्का प्रहार गरे ।
त्यस्तै नेपालका लागि सुबास खकुरेल र दिपेन्द्र सिह ऐरीले समान १९/१९ रन जोड्दा आरिफ शेख १६ तथा ज्ञानेन्द्र मल्ल १३ रन बनाए । नेपालका सन्दीप लामिछाने ८, रोहित कुमार पौडेल ६, अनिल साह ४ रनमा आउट हुँदा ललित भण्डारी ४ रनमा अविजित रहे ।
नेदरल्यान्ड्सका फ्रेड क्लासेनले ३ तथा माइकल रिप्पोन र पिटर सीलरले २/२ विकेट लिएका थिए ।
नेपालले दिएको उच्च लक्ष्यसहित जवाफी ब्याटिङ गरेको नेदरल्यान्ड्स पुरै ५० ओभरमा अलआउट हुँदै २ सय १५ रनमा समेटियो ।
तर, नेपालले जित निकाल्न अन्तिम बलसम्म कुर्नु परेको थियो ।
अन्तिम ओभरमा पारस नायक बन्दा नेपालले जित हासिल गरेको थियो ।
नेदरल्यान्ड्सलाई अन्तिम ओभरमा जितका लागि ६ रन आवश्यक थियो । उसको १ विकेट हातमा थियो । कप्तान पारसको पहिलो बलमा क्लासेनले १ रन जोडे । दोस्रो बलमा रन नेदरल्याण्डले रन जोड्न सकेन । तेस्रो बलमा मीकेरनले १ रन जोडे । त्यसपछि चौथो बलमा क्लासेनले दुई रन जोड्दा नेदरल्यान्ड्सलाई २ बलमा २ रन आवश्यक रह्यो ।
चौथो बलमा क्लासेनले रन जोड्न सकेन र अन्तिम बलमा नेदरल्यान्ड्सलाई २ रन आवश्यक रह्यो ।
अन्तिम बलमा क्लासेनले स्ट्रेट ड्राइभ गरे । भाग्यवश, बलले नन स्ट्राइक क्षेत्रको विकेटलाई लाग्छ र बल पारसको नजिक पुग्छ ।
नेदरल्यान्ड्सका दुवै ब्याट्सम्यान रनको लागि पिचमा कुदिरहेका हुन्छन् ।
पारसले आफु नजिकै आएको बल टिपेर स्टम्प उखेलीदिन्छन् । र, नेपालले रोमान्चक, ऐतिहासिक अनि नाटकीय जित हात पार्छ । यो जित नै नेपालको पहिलो एकदिवसीय अन्तर्राष्ट्रियमा जित हो ।
क्लासेनले १३ रन जोड्दा मीकेरनले अविजित १२ रन जोडे । यस्तै नेदरल्यान्ड्सका वेस्ली बार्रेसीले ७१ रनको अर्धशतकीय इनिङ्स खेले । त्यसबाहेक उसका ड्यानियल टेर ब्राकले ३९, पिटर सिलारले २१ रन जोड्दा बेन कोपेरले १९ तथा शेन स्नाटरले १२ रन बनाए ।
नेपालका सन्दीप लामिछानेले ३ विकेट लिएका थिए । यस्तै ललित भण्डारीले २ विकेट लिदा कप्तान पारस खड्का, सोमपाल कामी, दिपेन्द्र सिंह ऐरी र बसन्त रेग्मीले १/१ विकेट लिएका थिए ।
निराशको दुई वर्ष :
एकदिवसीय मान्यता पाएको २ वर्ष पुगिसक्दा नेपालले हालसम्म मात्र १० एकदिवसीय अन्तर्राष्ट्रिय खेल खेलेको छ । जसमा नेपालले समान ५ जित र ५ हार ब्यहोरेको छ ।
नेदरल्यान्ड्ससँगको सिरिजपछि नेपाली समर्थकले थुप्रै आशा बोकेका थिए । जस्तै नेपाल अब अन्तर्राष्ट्रिय खेलमा अन्य राष्ट्र जस्तै निरन्तर हुन्छ । खेलाडीले राम्रो सेवा सुबिधा पाउने छन् । नेपालले स्तरीय क्रिकेट खेल्नेछ । टेष्ट राष्ट्रको खेलाडीसँग तुलना गर्न पाईनेछ आदि इत्यादि ।
तर, समर्थकको सपना सपनामै सिमित छ । न नेपालले स्तरीय खेल खेल्न सकेको छ । न खेलाडीले राम्रो सुबिधा पाएका छन् ।
दुई वर्षमा नेपालले मात्र १० एकदिवसीय अन्तर्राष्ट्रिय खेल खेल्नु आफैमा सुखद सन्देश हैन ।
नेपाल क्रिकेट संघ क्यान निलम्बन रहेको अवस्थामा सिरिज आह्वान गर्न नसकिएको हो । तर, अहिले अवस्था फेरिएको छ । क्यानको प्रतिबन्ध फुकुवा भईसकेको छ । क्यानले नयाँ नेतृत्व पाईसकेको छ ।
पक्कै पनि क्यानले अब नेपाली क्रिकेटलाई स्फुर्त तरिकाले लैजाने विश्वास गर्न सकिन्छ ।
नेपालको अहिलेको लक्ष्य एकदिवसीय विश्वकप खेल्ने र एकदिवसीय अन्तर्राष्ट्रिय मान्यता जोगाइ राख्नु हुनेछ ।
नेपालले विश्वकप क्रिकेट लिग–२ अन्तर्गतका सिरिज खेलिरहेको छ ।
लिग–२ मा एकदिवसीय अन्तर्राष्ट्रिय मान्यता पाएका ७ राष्ट्र रहेका छन् । जहाँ सन् २०२२ सम्ममा हरेक राष्ट्रले ३६ एकदिवसीय खेल खेल्ने छन् । लिगको अन्त्यमा शीर्ष तीनमा पर्ने टिमले सन् २०२३ मा हुने विश्वकपको लागि सिधै विश्वकप छनोटमा स्थान बनाउने छ ।
त्यस्तै एकदिवसीय वरियतामा सुधार गर्दै थप चार वर्षको लागि एकदिवसीय अन्तर्राष्ट्रिय मान्यता लम्ब्याउने अवसर रहने छ । सुन्दा जति सहज देखिन्छ, एकदिवसीय वरियता जोगाउनै नेपालको लागि चुनौतीपुर्ण देखिन्छ ।
लिग–२ मा नेपालले ३६ मध्य ३२ खेल खेल्न बाँकी छ । खेलेको ४ खेलमा २ जित निकाल्दा २ हार ब्यहोरेको छ । आउने खेलहरु आफु भन्दा बलियो टिमसँग खेल्नेछ । यता, नेपालको प्रदर्शन दिन दिनै ओरालो लागेको देखिन्छ ।
अब नेपालले बाँकी २ वर्षमा कम्तिमा ३२ एकदिवसीय खेल खेल्नेछ ।
बाँकी खेल निकै महत्वपूर्ण रहेको कारण थप स्तरीय क्रिकेट खेल्दै नेपालले लिगको बाँकी खेलका लागि तयारी गर्नु पर्नेछ ।
बेलैमा नेपालले आफ्नो कमजोरीको कारण तत्व पत्ता लगाएर समाधान नगरे एकदिवसीय अन्तर्राष्ट्रिय मान्यता जोगाईराख्न गाह्रो पर्ने देखिन्छ ।
