एजेन्सी । भारतको चर्चित क्रिकेट लिग इण्डियन प्रिमियर लिग (आईपीएल) यस वर्ष संयुक्त अरब इमिरेट्स (युएई) मा आयोजना हुँदैछ ।
गत मार्चमा तय भएपनि कोरोना भाईरसको कारण स्थगित १३ औं संस्करणको आईपीएल युएईमा गर्न लागिएको हो ।
आईपीएल युएईमा आयोजना हुन लागेको यो दोस्रो पटक हो । यसअघि सन् २०१४ मा समेत पहिलो चरणको खेलहरु युएईमा भएको थियो । यस पटक भने पुरा सिजन युएईमा हुनेछ ।
कोरोनाको माहामारीको कारण अष्ट्रेलियामा यसै वर्ष आयोजना हुने भनिएको टी-ट्वान्टी विश्वकप स्थगित भएपछी भारतलाई आईपीएल गराउन बाटो खुलेको थियो ।
भारतीय क्रिकेट नियन्त्रण बोर्ड (बीसीसीआई) ले सेप्टेम्बरबाट नोभेम्बरसम्म आईपीएल गराउने तयारी गरेको छ ।
भारतमा कोरोनाको महामारी तिब्र गतिमा फैलिरहेपछि बीसीसीआईले युएईमा प्रतियोगिता गर्न लागेको हो ।
भारतमा कोरोना नियन्त्रण भन्दा बाहिर गएपछि बीसीसीआईले आईपीएल आयोजनाका लागि युएईलाई उपयुक्त भेन्यु ठानेको छ ।
यस अघि युएईसँगै श्रीलंका र न्युजिल्याण्डले आईपीएल आयोजना गराउन चाहेका थिए । तर, बीसीसीआईले युएईमा रोजेको हो ।
बीसीसीआईले आईपीएलका लागि युएई रोज्नुको कारण के हो ?
पहिलो कुरा युएईले यस अघि पनि आईपीएलको आयोजना गरिसकेको छ । दोस्रो, युएईले समेत इंग्ल्याण्ड र वेल्स क्रिकेट बोर्डले जस्तै जैविक सुरक्षा अपनाउन सक्ने क्षमता राख्दछ ।
दुबई स्पोर्ट्स सिटी, जहाँ दुबई अन्तर्राष्ट्रिय क्रिकेट रंगशाला र आईसीसी एकेडेमी रहेका छन् । यी दुवै मैदानमा टी-ट्वान्टी खेल खेलाउन योग्य छन् ।
'रंगशालामा ९ विकेट छन् जसले एकै दिनमा धेरै खेलाउन सकिन्छ । विकेट ताजा बनाउन कुनै पनि समय कुर्नु पर्दैन,' दुवई स्पोर्ट्स सिटीका प्रमुख सलमान हानिफले गल्फ न्युजमा भनेका छन्, 'आईसीसी कम्प्लेसमा मात्र ३८ विकेट छन्, जुन ओभल मैदानमा फैलिएका छन् । टर्फ विकेट र इन्डोर सुविधा भएको कारण गर्मी छल्न मद्दत हुन्छ ।'
युएईले कसरी आयोजक र फ्रेन्चाइजलाई सहयोग गर्छ ?
आईपीएल युएईमा आयोजना गर्नुको कारण सेवा सुविधा र हवाई उडान हो । फ्रेन्चाइजको लागि युएईले सबै भन्दा सुरक्षित र व्यवस्थित तरिकाले खेलाडी जम्मा गर्न सक्छ ।
खेलाडीहरु समेत दुबईमा बस्न रुचाउँछन् किनकि सारजाह मात्र ३० मिनेटको यात्रामा पर्छ । अबुधावी भने १ घण्टा ३० मिनेट लाग्ने गर्छ । थुप्रै मिडियाका अनुसार फ्रेन्चाइज टिमले आफ्नो टिमको लागि स्थान रोजिसकेका छन् । मुम्बई इण्डियन्सले आफ्नो पार्टनर रहेको जे डब्लु म्यारिअट ग्रुपमा आफ्नो टिम व्यवस्थापन गर्ने बताइएको छ । अन्य टिमले समेत आफ्नो व्यवस्थापन मिलाउन सुरु गरेको रिपोर्टमा बताइएको छ ।
युएईको क्रिकेट रंगशाला -
हालसम्म आईपीएल कुन मैदानमा हुने भन्ने टुंगो लागेको छैन । आईपीएलको गभर्ननिङ कमिटिको जुलाई २४ मा बस्ने बैठकले रंगशालाको तय गर्नेछ ।
युएईमा दुई टेष्ट खेल्न योग्य रंगशाला रहेका छन् भने अन्य ३ मैदानमा लिस्ट ए र टी-ट्वान्टी प्रतियोगिता आयोजना हुँदै आएका छन् । दुबईमा दुबई क्रिकेट रंगशाला, आबुधाबीमा शेख जयद क्रिकेट रंगशाला र सारजाहमा सारजाह क्रिकेट एसोसियसन रंगशाला रहेका छन् ।
यस्तै दुबईमा आईसीसी एकेडेमीको ग्राउण्ड एक छ भने दुबई क्रिकेट काउन्सिलको दुई वटा मैदान समेत रहेका छन् ।
दुबई अन्तर्राष्ट्रिय क्रिकेट रंगशाला र सारजाह क्रिकेट एसोसियसन रंगशाला टेष्ट रंगशाला हुन् । आईसीसी एकेडेमीमा समेत एकदिवसीय अन्तर्राष्ट्रिय र टी-ट्वान्टी अन्तर्राष्ट्रिय क्रिकेट आयोजना भईसकेको छ ।
शेख जयद क्रिकेट रंगशालाको परिसरमा दुई मैदान छन् जसलाई नर्सरी एक र नर्सरी दुई भनिन्छ । नर्सरी एक भनिने टोलरेन्स ओभलमा युएई र अष्ट्रेलियाको टी-ट्वान्टी अन्तर्राष्ट्रिय खेलको लागि सन् २०१८ मा प्रयोग गरिएको थियो ।
समर्थकले प्रवेश पाउन सक्ने -
युएईले आईपीएलमा समर्थकलाई प्रवेश गराउने योजना समेत बनाएको छ । इमिरेट्समा कोरोना संक्रमण नियन्त्रणमा आएको कारण उसले समर्थकलाई प्रवेश गराउन सकिने बताएको छ । युएईमा कुल ५० हजार व्यक्तिमा कोरोना संक्रमण भेटिएको थियो भने ३ सयको निधन भएको थियो ।
'मैदानमा समर्थक भित्र्याउन सरकारको अनुमति चाहिन्छ । हामीले केही निर्णय लिनु अघि बृहत छलफल गर्ने छौं,' युएई क्रिकेट बोर्डका जेनेरल म्यानेजर मुबासिर उस्मानीले टेलिग्राफमा भनेका छन्, 'अझै आईपीएलको लागि समय छ । हामीले यसबारे विचार गर्दैछौं ।'
युएईमा भएको आईपीएल -
सन् २०१४ मा आईपीएलको पहिलो २० खेल युएईमा भएको थियो । खेलहरु तीन मैदानमा आयोजना भएका थिए । दुबई अन्तर्राष्ट्रिय क्रिकेट रंगशाला, अबुधावी र सारजाह क्रिकेट रंगशालामा आयोजना भएको थियो । जसमध्ये सारजाहमा ६ खेल भएको थियो भने दुबई र अबुधावीमा समान ७-७ खेल भएको थियो ।
