पोखरा । कास्की जिल्ला फुटबल संघमाथि छानबिन गर्न गठित समिति असार १६ मा पोखरा आएको थियो । पोखरा ओर्लिएको भोलिपल्टै समितिले छानबिन प्रक्रिया अघि बढायो ।
एन्फाका उपाध्यक्ष वीरबहादुर खड्का नेतृत्वको टोलीले ११ दिन लगाएर आईतबार छानबिन सक्यो र शनिबार पत्रकार सम्मेलन गरेर जानकारी गरायो । एन्फा कास्कीका पूर्वअध्यक्ष आनन्द रन्जित र विष्णुप्रसाद पराजुली सम्मिलित समितिले ११ दिन लगाएर प्रतिवेदन तयार पारेको हो ।
समितिले कास्की जिल्ला फुटबल संघले आयोजना गरेका प्रतियोगिताको हिसाब–किताब माग गर्दै छानबिन प्रक्रिया अघि बढाएको थियो । समितिले ६ वटा प्रतियोगिताका कागजात तथा विल भरपाई माग गर्दै अध्ययन गरेको हो ।
जिल्ला फुटबल संघले २०७५ मा आयोजना गरिएको मनकामना कप, जिल्ला लिग, जिल्ला स्तरीय अन्तर विद्यालय फुटबल प्रतियोगिता, प्रदेश स्तरीय अन्तर विद्यालय फुटबल प्रतियोगिता तथा पुरुष र महिलाको अन्तर विद्यालय फुटबल प्रतियोगिताको कागजात बुझाएको थियो ।
छानबिन सुरु भएपछि विभिन्न सूचना बाहिरिए । तर सार्वजनिक भएका सुचना भने छानबिन समितिका सदस्यले पुष्टि गर्न हिच्किचाए । समितिले आर्थिक पाटो मात्र हेर्ने भन्दै अनुसन्धान सुरु गरेको थियो । तर आर्थिक पाटो हेर्ने उल्लेख गरेको समितिले कोषाध्यक्षसँग सुरुमा बयाननै लिएन ।
छानबिन सकिनु भन्दा एक दिन अघि मात्र कोषाध्यक्षको बयान लिएको थियो । समितिले कोषाध्यक्षलाई अनौपचारिक भेटेको थियो । कोषाध्यक्ष मातृ शोकमा रहेको हुँदा अनुसन्धानका लागि नभएर व्यक्तिगत रुपमा भेटेको समितिका संयोजक खड्काले बताएका छन् ।
कोषाध्यक्ष विजया गुरुङले यसअघि खेलपाटीसँगको कुराकानीका क्रममा आफ्नो हस्ताक्षर कीर्ते गरिएको दाबी गरेकी थिइन् । अनुसन्धानको क्रममा उनले बोली फेरिन । उनले आफुलाई अध्यक्ष मिलन गुरुङले आवश्यकता अनुसार चेकमा हस्ताक्षर गराउने गरेको बताईन् ।
के भनेकी थिइन् कोषाध्यक्षले ?
‘जिल्ला फुटबल संघको काममा नहिडेको एक वर्ष पुग्न लाग्यो । त्यसैले भित्रका कारोबारका बारेमा थाहा छैन । मैले चेकमा हस्ताक्षर नगरेको पनि धेरै भईसक्यो । मेरो नक्कली हस्ताक्षर गरेका छन् रे भन्ने सुनेकी छु । मैले त्यहाँ राजीनामा नै बुझाएकी छैन । तर अब आउदिन भनेकै १ वर्ष कटिसक्यो । त्यसयता बैठकमा पनि उपस्थित भएकी छैन । माइन्युट हेरे थाहा होला । सुने अनुसार मेरो हस्ताक्षर निकै सरल भएका कारण नक्कली हस्ताक्षर गरेका छन् ।
बैँकले पनि कतिपय चेक हस्ताक्षर नमिलेर फर्काइदिएको जानकारीमा आएको छ । कतिपय चेक बाउन्स पनि भएका होलान्, तर मलाई बैँकले भने खबर गरेका छैनन् ।
यो सबै मैले सुनेको कुरा हुन्, कसले र किन मेरो हस्ताक्षर प्रयोग गरेको छ मलाई जानकारी छैन । अहिले मसँग संस्थाको कुनै चेक पनि छैनन् । पहिले उनीहरुले चाहिँदा चेक लिएर आउँथे, अहिले त्यो पनि बन्द भइसक्यो । चेकहरु अहिले अध्यक्षसँगनै छन् । मैले आफ्नो नीजि कारणले गर्दा त्यहाँ जान छाडेकी हुँ । मलाई बाध्यकारी रुपमा त्यहाँ लगिएकी हुँ, मैले अहिले छाडीसके ।’
कोषाध्यक्षको बयानबारे छानबिन समितिका संयोजक खड्कासँग बुझ्दा अनविज्ञता देखाए । छानबिन सकिएपछि आयोजित पत्रकार सम्मेलनमा यसबारे पटक–पटक प्रश्न गर्दा पनि खड्काले बोल्न चाहेनन् । श्रोतका अनुसार कोषाध्यक्ष विजया गुरुङले छानबिन समितिलाई आफुले एकैसाथ धेरै खाली चेकमा हस्ताक्षर गर्ने गरेको स्विकारेकी छन् ।
छानबिनको क्रममा जिल्ला फुटबल संघभित्रको अन्तरसंघर्ष समेत बाहिर आयो । छानबिनलाई सघाउन भन्दै फुटबल संघका पदाधिकारीले अध्यक्ष मिलन गुरुङको राजीनामा माग गर्ने मनस्थिती बनाएका थिए । गुरुङलें राजीनामा नबुझाए संघका पदाधिकारीले सामुहिक राजीनामा दिने भन्दै आन्तरिक छलफल गरेका थिए ।
छानबिन समितिले संघका पदाधिकारीलाई राजीनामा नबुझाउन सुझाएपछि उनीहरु पछि सरे । अन्तत पदाधिकारीले न त राजीनामा दिए, न त राजीनामानै माग गरे ।
संयोजक खड्काले आफुले संघका पदाधिकारीसंग कुनै आग्रह नगरेको पटक पटक दोहर्याए ।
कप संचालक सदस्य नै छानबिन समितिमा
एन्फाद्धारा गठित छानबिन समितिले २०७५ देखि आयोजित मनकामना कपलाई प्राथमिकतामा राख्दै अनुसन्धान गरेको हो । तर मनकामना कप संचालन गर्ने आनन्द रञ्जितनै छानबिन समितिमा थिए । यसले छानबिनलाई प्रभावित पारेको सम्बद्ध अधिकारी बताउँछन् ।
छानबिन समितिका सदस्य रञ्जितले मनकामना कप संचालन गर्ने समयमा प्राविधिक टोलीमा रहेकाले अनुसन्धानमा कुनै आँच आउन नदिएको बताउँछन् । ‘त्यसबेला प्राविधिक टोलीमा थिए। तर अहिले छानबिन बिथोलिने गरी कुनै कार्य गरेको छैन, सक्दो रुपमा हामीले सही प्रतिवेदन बनाएका छौ ।’ रञ्जितले भने ।
संयोजक खड्का भने एन्फा कास्कीका पूर्व अध्यक्ष रञ्जित फुटबलको भलो चिताउने ब्यक्ति रहेको भन्दै शंका लिनु नपर्ने बताउँछन् ।
‘उहाँ फुटबलको भलो चिताउने पात्र हुनुहुन्छ । प्रतियोगिता संचालनका बेला समितिमा हुनुहुन्थ्यो होला, तर अहिले यसले कुनै फरक पार्दैन । हामीलाई उहाँले छानबिनमा सक्दो सहयोग गर्नुभएको छ । उहाँ माथि शंका गर्नुपर्दैन ।’ खड्काले भने ।
मनकामना कपको आय व्ययको विवरण जिल्ला फुटबल संघले अझै सार्वजनिक गर्न सकेको छैन । अहिले आय–व्यय सार्वजनिक गर्न नसक्नुलाई अध्यक्ष गुरुङले लकडाउनको कारण देखाउँछन् ।
खेलपाटीसँगको कुराकानीमा लकडाउन सकिएको भोलिपल्टै पत्रकार सम्मेलनमार्फत आय व्यय सार्वजनिक गर्ने बताएका थिए । तर अनुसन्धानको क्रममा छानबिन समितिले मनकामना कपमा करिब २९ लाखको नोक्सानी भएको देखाउँदै आय–व्यय सार्वजनिक गरिदिएको छ ।
होला त कारबाही ?
छानबिन समितिका संयोजक खड्काले घुमाउरो पारामा छानबिनका क्रममा अनियमितता देखिएको स्वीकार गरेका छन् । समितिका अर्का सदस्य विष्णु प्रसाद पराजुलीले एन्फा कास्कीभित्र आर्थिक अनियमितता भएको कारण सहित बताएका थिए ।
संयोजक खड्काले आफुहरु अनियमितता भएकै कारण पोखरा आएको बताउँदै भने, ‘अनियमितता नभएको भए हामी आउनु पर्दैनथ्यो, राम्रो काम गर्ने माथि कसैले छानबिन गर्दैन । प्रतिवेदन तयार छ, बाँकी प्रक्रिया सुरु हुन्छ ।’
छानबिन समितिका सदस्य पराजुलीले भने केन्द्रकै कमजोरीका कारण अनियमितता भएको भन्दै एन्फा कास्कीको विवादमा केन्द्रिय एन्फा जिम्मेवार रहेको उल्लेख गरे ।
बार्षिक अडिट र आय–व्यय सार्वजनिक नगरेको संघको सदस्य नविकरण गर्दा पछिल्लो अवस्था सिर्जना भएको उनको भनाई छ ।
छानबिन समितिले पत्रकार सम्मेलनमा अनियमितताका पर्याप्त आधार देखिएको बताएपनि कतिपय जानकार सम्बन्धित ब्यक्ति र संघलाई कारबाही हुनेमा शंका ब्यक्त गर्छन् । पत्रकार सम्मेलनमा कतिपय अधिकारीले बाँकी प्रक्रिया पोखरामा नै हुनुपर्ने माग गरेका थिए । केन्द्रले प्रतिवेदन कार्यान्वयन गर्नेमा शंका ब्यक्त गर्दै उनीहरुले बाँकी प्रक्रिया पनि पोखरामै हुनुपर्ने माग गरेका थिए ।
एन्फा कास्कीका अध्यक्ष मिलन गुरुङ गत माघमा बैकिंङ कसुर सहित तीन वटा मुद्दामा पक्राउ परेपछि जिल्ला फुटबल संघभित्रका आर्थिक अनियमितताको बिषय बाहिर आएको थियो ।
यसअघि एन्फाले केन्द्रीय सदस्य रत्नकुमार श्रेष्ठको संयोजकत्वमा ३ सदस्यीय छानविन समिति बनाएको थियो । तर समितिले आफ्नो प्रतिवेदन बुझाउन सकेको थिएन । समितिका संयोजक श्रेष्ठले स्वास्थ्य अवस्था कमजोर रहेको कारण देखाउँदै राजीनामा दिएपछि नयाँ समिति गठन भएको थियो ।
असार २ गतेको एन्फा कार्यसमितिको आपत्कालिन बैठकले उपाध्यक्ष वीरबहादुर खड्काको संयोजकत्वमा एन्फा कास्कीको विवादबारे अनुसन्धान गर्न नयाँ छानबिन समिति गठन गरेको थियो । यस समितिले आफ्नो प्रतिवेदन एन्फालाई बुझाउने छ । सो प्रतिवेदन हेरेपछि एन्फाले कास्की जिल्ला फुटबल संघलाई कारबाही गर्ने-नगर्ने बिषयमा औपचारिक निर्णय गर्नेछ ।
