किरणलाई विदेशी कम्पनीको प्रायोजन

काठमाडौं । नेपाली राष्ट्रिय फुटबल टिमका गोलकिपर किरण चेम्जोङलाई विदेशी कम्पनी आरजीले प्रायोजन गरेको छ ।

नेपाली राष्ट्रिय टोलीका कार्यवाहक कप्तान समेत रहेका किरणलाई साइप्रसको ग्लोभ्स कम्पनी आरजीले प्रायोजन गरेको हो ।

भारतीय क्लब मिनर्भा पन्जाबबाट खेलिरहेका किरणलाई आरजीले दुई वर्षको लागि प्रायोजन गरेको हो ।

'युरोपियन कम्पनिसँग जोडिएको छु । आरजी कम्पनीले दुई वर्षको लागि प्रायोजन गरेको छ । रकम छैन मलाई कम्पनीले आवश्यक खेलकुद सामग्री उपलब्ध गराउने छन्,' किरणले खेलपाटीसँग भने ।

किरणले बुधबार कम्पनीसँग औपचारिक रुपमा सम्झौता गरेका छन् ।

सम्झौता अनुसार आरजीले किरणलाई हरेक वर्ष २० जोर ग्लोभ्स उपलब्ध गराउनेछ ।

दुई वर्षको ग्लोभ्सको प्रायोजन रकम करिब ६ लाख पर्ने बताईएको छ ।

नेपाली गोलकिपरले ग्लोभ्सको प्रायोजन पाएको यो पहिलो अवसर हो ।

यस अघि विभिन्न खेलाडीले प्रायोजक पाउँदै आएपछि गोलकिपरलाई ग्लोभ्स कम्पनीले प्रायोजन गरेको थिएन ।