धादिङमा 'होम ग्राउण्ड' बनाउँदै एनआरटी र आरसिटी !

धादिङ । न्युरोड टिम (एनआरटी) र रानीपोखरी कर्नर टिम (आरसिटी) नेपाली फुटबल इतिहासकै चर्चित र पुराना क्लब हुन् ।

एनआरटी र आरसिटी काठमाडौंको रैथाने क्लब हो । आरसिटीले ६ पटक र एनआरटीले ४ पटक ए डिभिजन लिग जितेको छ ।

तर, यतिबेला दुवै क्लब काठमाडौं बाहिर निस्कने योजनामा छन् ।

बिहीबार मात्र दुई क्लबका पदाधिकारी राजधानी नजिकैको जिल्ला धादिङको भ्रमणमा आएका थिए ।

एनआरटीका अध्यक्ष सुन्दर जोशी र महासचिव नरेन्द्र श्रेष्ठ तथा आरसिटीका उपाध्यक्ष कुमार राज भण्डारी र सह सचिव रविन महर्जनले जग्गा निरीक्षण गरेका थिए ।

क्लबको घरेलु मैदान अर्थात् 'होम ग्राउण्ड' निर्माणका लागि जग्गा खोज्दै दुई क्लबका पदाधिकारी धादिङको धार्के आएका हुन् ।

राष्ट्रिय खेलकुद परिषद् (राखेप) र अखिल नेपाल फुटबल संघ (एन्फा) को पहलमा क्लबका पदाधिकारीले धुनिवेशी नगरपालिकाको पुरानो धार्केमा रहेको जग्गा निरिक्षण गरेका छन् ।

एनआरटी र आरसिटीका पदाधिकारीले भुवनेश्वरी माध्यामिक विद्यालयको मातहतमा रहेको करिब ३३ रोपनी जग्गामा फैलिएको मैदानको निरीक्षण गरेका थिए ।

दुवै क्लबले यस मैदानलाई आफ्नो घरेलु मैदानसहित एकेडेमी बनाउने योजना बनाएका छन् । क्लबले मैदानमा होस्टेल भवनसहित प्यारापिट समेत बनाउने जनाएको छ ।

तर, सम्पूर्ण भौतिक निर्माणका लागि जग्गा अपुग हुने देखिएको छ । क्लबले सुविधा सम्पन्न एकेडेमीसहितको मैदानमा लागि करिब ४० रोपनी जग्गा आवश्यक पर्ने जनाएको छ ।

विद्यालयको मातहतमा रहेको यस मैदानमा पूर्वाधार विकासका लागि प्रदेश ३ सरकार र धुनिवेशी नगरपालिकाले १–१ करोड विनियोजन समेत गरेको छ । जसको कारण विद्यालयले १ करोड ८० लाखको टेन्डर सहित मैदान निर्माणको काम अगाडी बढाईसकेको छ ।

जग्गा निरिक्षणपछि एनआरटी अध्यक्ष सुन्दर जोशीले जग्गा लिनेमा क्लब सकारात्मक रहेको र राखेप, एन्फा र नगरपालिकासँग सहकार्य गरेर अगाडी बढ्ने बताए ।

‘जग्गा हेरेपछि सकारात्मक देखिएका छौं । चाडैनै क्लबको बैठक बस्ने छ । जग्गाको कुरा फाइनल भएसँगै एन्फा, राखेप र नगरपालिकासँग मिलेर काम अघि बढाउने छौं,’ चार पटक ए डिभिजन लिग जितिसकेको क्लबका अध्यक्ष जोशीले भने ।

नगरपालिकाका मेयर बालकृष्ण आचार्यले आफ्नो नगरपालिका क्लबहरुसँग मिलेर खेलकुद क्षेत्रमा लाग्न तयार भएको बताए ।

‘नगरपालिकाले आफ्नो क्षेत्रलाई गौरवान्वित बनाउन काम सुरु गरेको छ । खेल मैदान सहित पार्क बनाउने, नगर स्तरिय हस्पिटल, होटल बनाउने योजना ल्याएको छ । जसले गर्दा धुनिवेशी नगरपालिकाको प्रमोट हुन्छ,’ आचार्यले भने, ‘काठमाडौं नजिक रहेर पनि हाम्रो क्षेत्र केहि नभए जस्तो भएको छ । सफल टिम पाएको अवस्थामा सहकार्य गर्दै अगाडि बढ्नेछौं ।’

यस्तै आरसिटीका सह सचिव रविन महर्जनले जग्गाप्रति क्लब सकारात्मक भएको बताए ।

एसियाली खेलकुद महासंघ (एएफसी) ले आफ्ना सदस्य राष्ट्रका क्लबहरुलाई लाईसेन्स प्रणाली अनिवार्य गरेको छ । जसका लागि क्लबसँग होम ग्राउण्ड, आफ्नै एकेडेमी, युथ टिम अनिवार्य रहेको छ ।

एएफसीको नियममा बाधिएको क्लबले मात्रै एएफसीको आधिकारीक प्रतियोगितामा सहभागीता जनाउन पाउनेछन् । जसअनुसार एन्फाले राखेपको सहायतामा क्लबहरुलाई उपत्यका बाहिर लैजाने योजना ल्याएको हो ।

कोरोना भाईरसको महामारीबीच बिहीबार क्लबका पदाधिकारीसँगै राखेप सदस्य सचिव रमेश सिलवाल, एन्फा अध्यक्ष कर्मा छिरिङ शेर्पा, उपाध्यक्ष शिक्षित पराजुली समेत धादिङ आएका थिए ।

पछिल्लो समय एन्फाको विरोधमा उत्रिरहेका धादिङ जिल्ला फुटबल संघका अध्यक्ष दिपक खतिवडा भने निरीक्षणमा उपस्थित भएनन् । यद्यपि महासविच रामहरि थापा लगायत अन्य प्रतिनिधिले स्थलगत निरिक्षण गरेका थिए ।

उक्त टोलीले धादिङमा रहेका अन्य विभिन्न मैदानको समेत निरिक्षण गरेका थिए ।

टिमले धुनिवेशीकै बानियाटारमा नवनिर्मित खेल मैदान, थाक्रेको गनिशेचौर खेल मैदान, गजुरीको गलौदीको खेलमैदान र चरौदीमा बन्न लागेको मैदान निरीक्षण गरेका थिए । टोलीले सम्भावित दोस्रो मैदानको रुपमा गनिशेचौरलाई समेत हेरेको छ ।

निरीक्षणपछि एन्फाका अध्यक्ष शेर्पाले क्लबहरुको आफ्नै प्रशिक्षण स्थल नभएको र त्यसलाई मुर्तरुप दिन धादिङ झरेको बताए ।

‘अन्तराष्ट्रिय मापदण्ड अनुसार क्लबहरुको आफ्नै होम ग्राउण्ड चाहिन्छ । क्लबहरुको आफ्नै प्रशिक्षण केन्द्र नभएकाले त्यसैको मुर्तरुप दिन अगाडि बढेका छौं,’ अध्यक्ष शेर्पाले भने ।

अध्यक्ष शेर्पाले उपत्यकाको क्लबलाई काठमाडौं बाहिर लैजाने योजना बनाएको र त्यसै अनुसार धादिङलाई फुटबलको केन्द्र बनाउने बताए ।

‘एन्फाले काठमाडौंका क्लबलाई बाहिर लैजाने सोच बनाएको छ । धादिङमा पनि २–३ क्लबलाई प्रशिक्षण केन्द्र बनाउन सकिन्छ । जसले धादिङलाई फुटबलको केन्द्र बनाउने छ ।’

मैदान निरिक्षणपछि सदस्य सचिब सिलवालले धादिङको अर्काे नाम खेलले पनि जोडिनेमा आफु विश्वस्त रहेको बताए ।

‘काठमाडौं नजिकैको जिल्ला रहेको छ । सुरुङ मार्ग बनेसँगै क्लबलाई झनै सहज हुनेछ । यहाँ खेलमात्रै हैन खेलाडी उत्पादन देखि लिएर इकोनोमिक्स फाइदा पनि हुन्छ । स्थानियले राष्ट्रिय खेलाडीपनि देख्न पाउँछन् । अब, धादिङको अर्काे नाम खेलले पनि जोडिन्छ’ उनले भने ।