ला लिगामा 'मेक्सिकन मेस्सी' !

एजेन्सी । स्पेनिस ला लिगा फुटबलमा बुधबार राति मालोर्का रियल मड्रिडसँग पराजित भयो ।

रियलको अस्थाई घरेलु मैदानमा मालोर्का २-० ले पराजित भएको थियो ।

तर,अल्फ्रेडो डी स्टेफानो रंगशालामा मालोर्का र उसका एक युवा खेलाडीले इतिहास रच्न सफल भयो ।

लुका रोमेरो रियलविरुद्ध ८३ औं मिनेटमा मैदान प्रवेश गरे । जतिबेला उनी उमेर १५ वर्ष २ सय १९ दिनका थिए ।

यससँगै अट्याकिङ मिडफिल्डर रोमेरो ला लिगाको इतिहासमै डेब्यु गर्ने सबैभन्दा कम उमेरका खेलाडी बने ।

सेल्टा भिगोका पूर्व डिफेन्डर सानसनको कीर्तिमान भङ्ग गर्दै रोमेरोले ला लिगामा डेब्यु गर्ने सर्वाधिक कान्छा खेलाडीको इतिहास बनाए । सानसनले १५ वर्ष २ सय ५५ दिनको उमेरमा ला लिगामा डेब्यु गरेका थिए ।

सन् २०१५ मा मालोर्काको एकेडेमीमा आएका रोमेरोलाई मुख्य प्रशिक्षक भिसेन्ट मोरेनोले यहिँ जुन ५ मा पहिलो पटक सिनियर टिममा बोलाएका थिए । र, सिनियर टिममा परेको २० दिन पछि नै रोमेरोले शीर्ष डिभिजनमा डेब्यु गरे ।

रोमेरो होचा कदका छन् । 'लेफ्ट फुटेड' खेलाडी हुन् । बार्सिलोनाका कप्तान लियोनल मेस्सी जस्तै ।

रोमेरोको बल कन्ट्रोल, ड्रिबलिङ र विपक्षी खेलाडीलाई बिट गर्ने क्षमता असाधारण छ । त्यसैले उनलाई 'मेक्सिकन मेस्सी' भनेर समेत बोलाईन्छ ।

'उनको देब्रे खुट्टा निकै छिटो छ । प्रतिस्पर्धात्मक छ,' मालोर्काका सहायक प्रशिक्षक डानी पेन्डिनले भने, 'उनी अर्जेन्टिनाका नम्बर १० जस्तै छन् । उनीसंग धेरै कुराहरु छन् । उनले मलाई डेभिड सिल्भाको सम्झना गराउछ ।'

रोमेरो अर्जेन्टिनी हुन् । तर, उनी सन् २००४ नोभेम्बर १८ मा मेक्सिकोमा जन्मिए ।

रोमेरोको बुबा डिएगो रोमेरो पनि व्यवसायिक फुटबल खेलाडी हुन् । अर्जेन्टिनाका डिएगो मेक्सिकोको क्लबबाट खेल्दा रोमेरो त्यहिँ जन्मिएका थिए । तर, रोमेरो २ वर्षका हुँदा स्पेन आएका थिए ।

स्पेनको फुटबल एकेडेमी सान्ट जोर्डीबाट फुटबल सिकेका रोमेरोले अर्जेन्टिनाका यू-१५ टोलीबाट खेलिसकेका छन् ।

सन् २०१८ मा मालोर्कासँग आठ वर्षे सम्झौता गर्नु अघि रोमेरोले बार्सिलोनामा ट्रायल दिएका थिए । तर, १० वर्ष भन्दा कम उमेरको भएपछि बार्सिलोनाले उनलाई अनुबन्ध गरेको थिएन ।

तर, रोमेरोलाई अहिले बार्सिलोनाका महान खेलाडी मेस्सीसँग तुलना गर्न थालिएको छ ।

'उनले दक्षिण अमेरिकाको च्याम्पियनसिप खेलिसकेका छन् । उनको भविष्य ठुलो छ,' रोमेरोका पहिलो प्रशिक्षक एलेजान्ड्रो भन्छन्, 'हामी १५ वर्षे बच्चाको कुरा गर्दैछौँ । उले राम्रो खेलेको छ । तर, उ मेस्सी होइन उनको कागजातले लुका रोमेरो भनेको छ । उसले आफ्नै कथा लेख्नु पर्छ ।'

रोमेरोका बुबा डिएगो समेत आफ्ना छोरालाई मेस्सीसँग तुलना गरेको मन पराउदैनन् ।

'मेस्सीसँग तुलना गरेको मलाई मन पर्दैन । उनी १५ वर्षका छन् । यसलाई उनलाई ठुलो दबाब पर्छ,' अर्जेन्टिनाको क्लब सिपोलेट्टीबाट खेलिरहेका डिएगोले भने ।