एजेन्सी । श्रीलंकाका पूर्व खेलमन्त्री महिन्दानन्दा अलुथगामाले सन् २०११ मा भएको विश्वकपको फाईनल खेलमा फिक्सिङ भएको खुलासा गरेका छन् ।
उनले विश्वकपको फाईनलमा भारत र श्रीलंकाबीचको खेलमा फिक्सिङ भएको बताएका हुन् ।
भारतको मुम्बईस्थित वानखडे स्टेडियममा महेन्द्र सिंह धोनी नेतृत्वको भारतले श्रीलंकालाई ६ विकेटले हराउँदै विश्व च्याम्पियन बनेको थियो ।
पहिलो पटक आयोजक टिमले घरेलु मैदानमा विश्वकपको उपाधि जितेको थियो ।
सो समय अलुथगामा श्रीलंकाका खेल मन्त्री रहेको थिए ।
पूर्व खेलमन्त्रीको विवादास्पद अभिब्यक्ती आएपछि श्रीलंकाली भेट्रान खेलाडी कुमार संगकाराले प्रमाण दिन चुनौती दिएका छन् ।
पूर्व खेल मन्त्री अलुथगामाले देशको प्रतिष्ठा र सम्मानका लागि आफुले तत्कालिन समयमा कुनै कुरा बाहिर नबोलेको दाबी गरेका छन् ।
पूर्व मन्त्रीले विश्वकपको फाईनल खेललाई फिक्सिङको आरोप लगाएपनि कुनै प्रमाण पेश भने गरेका छैनन् । उनले फाईनल खेल श्रीलंकाले जित्न सक्ने भन्दै यस विवादमा खेलाडीलाई सहभागी गराउन नचाहने प्रष्ट पारे । तर उनले केही समूह म्याच फिक्सिङमा सहभागी बनेको अलुथगामाको आरोप छ ।
उनले श्रीलंकाको अग्रणी सञ्चारमाध्यमलाई दिएको अन्तरवार्तामा सो कुरा बताएका हुन् । उनले आफु आफ्नो भनाईमा कायम रहने उल्लेख गर्दै देशको भलाईका लागि विस्तारमा कुनै कुरा उल्लेख नगर्ने बताए ।
फाईनल खेलमा श्रीलंकाले ६ विकेट गुमाएर २ सय ७४ रन बनाएको थियो । महेला जयवर्धनेले ८८ बलमा १ सय ३ रन बनाएका थिए । कुमार संगकाराले ३० र कुलाशेखराले ४० रन बनाएका थिए ।
लक्ष्य पुरा गर्ने क्रममा लाथिस मालिंगाले सचिन तेन्दुलकर र विरेन्द्र सेहवागलाई सस्तैमा आउट गराएका थिए । तर गौतम गाम्भिर र महेन्द्र सिंह धोनीको ब्याटिङ्गमा भारतले लक्ष्य पुरा गरेको थियो ।
पूर्व खेलमन्त्रीको आरोपमा श्रीलंकाली पूर्व भेट्रान विकेटकिपर ब्याट्सम्यान पूर्व कप्तान कुमार संगकाराले धेरै गम्भिर आरोप भएको बताए । उनले पूर्व खेल मन्त्री प्रमाण सहित आईसीसीको भ्रष्टाचार निवारण ईकाईमा गरेर दाबी पेश गर्नुपर्ने धारणा राखे । उनले पूर्वमन्त्रीको प्रमाणमा आईसीसीले छानविन गर्ने र मन्त्रीको दाबी सहि वा गलत भएको पत्ता लाग्ने बताए ।
फाईनल खेल फिक्सिङ भएको आरोप लगाउने अलुथगामा दोस्रो ब्यक्ति हुन् । यसअघि श्रीलंकाका पूर्व कप्तान अर्जुन राणातुंगाले समेत सन् २०१७ मा फाईनल खेल छानबिन गर्न माग गरेका थिए । उनले समेत सन् २०११ को फाईनल खेल शंकाको घेरामा रहेको भन्दै छानविन हुनुपर्ने माग गरेका थिए ।
