काठमाडौं । हङकङले एसीसी इस्टर्न रिजन पुरुष टी-ट्वान्टी कप क्रिकेटमा लगातार दोस्रो जित निकालेको छ ।
थाइल्याण्डको बैंककमा मंगलबार भएको खेलमा आयोजक थाइल्याण्डलाई ८ विकेटले पराजित गर्दै हङकङले लगातार दोस्रो जित निकालेको हो ।
टेर्डथाई क्रिकेट मैदानमा थाइल्याण्डले दिएको ७८ रनको लक्ष्य हङकङले ७ ओभर ४ बलमा मात्र २ विकेट गुमाएर पुरा गर्यो ।
हङकङका लागि निजाकट खानले ३६ रन जोड्दा किन्चित साहले अविजित १९ रन बनाए । जेम्स जोन्सले अविजित ११ रन बनाए ।
यस अघि जितेर पहिले ब्याटिङ गरेको थाइल्याण्डले २० ओभरमा ८ विकेट गुमाएर ७७ रन जोडेको थियो । उसका लागि जिउल हकले २३ रन जोड्दा डानिल जाकोब्सले १३ रन बनाए । अन्य ब्याट्सम्यानले दोहोरो अंक जोड्न सकेनन् ।
हङकङका किन्चित साह, अफ्ताब हुसेन र इशान खानले २/२ विकेट लिए ।
जितसँगै हङकङले २ खेलमा ४ अंक जोडेको छ । र, शीर्ष दुईमा रहदै एसिया कप छनोटको सम्भावना बलियो बनाएको छ । हङकङले पहिलो खेलमा नेपाललाई ४३ रनले हराएको थियो ।
थाइल्याण्डको यो लगातार तेस्रो हार हो ।
प्रतियोगितामा नेपाल र मलेसियासहित थाइल्याण्ड, सिंगापुर र हङकङले प्रतिस्पर्धा गरिरहेका छन् ।
राउण्ड रोबिन आधारमा चल्ने प्रतियोगिताको शीर्ष दुई टोलीले एसिया कप छनोटमा स्थान बनाउने छन् ।
-1735306900.JPG)
