काठमाडौं । सरकारले संघीय संरचना अनुसार तयार गरिएको राष्ट्रिय खेलकुद विधेयक पारित गर्ने तयारी गरेको छ ।
संसदीय समितिले लामो छलफल गरेर पारित गरेको विधेयकलाई सोमबारको संसद बैठकमा पेश गर्ने संसद सचिवालयको तयारी छ ।
‘संसद सचिवालयले सोमबारको बैठकको कार्यसुचिमा खेलकुद विकास विधेयकलाई राखेको छ ।’ युवा तथा खेलकुद मन्त्री जगत विश्वकर्माले खेलपाटीसंग भने, ‘संसद बैठकले विधेयक पारित गर्नेछ ।’
खेलकुद मन्त्री विश्वकर्माले २०७५ फागुन ५ गते राष्ट्रिय सभामा विधेयक दर्ता गराएका थिए । राष्ट्रिय सभामा सामान्य छलफलपछि सो विधेयक विधायन व्यवस्थापन समितिमा पठाईएको थियो ।
समितिले बैशाख २० देखि साउन ४ गतेसम्म सरोकारवालासंग छलफल गरेर सयवटा संशोधन सहित विधेयक तयार गरेर समितिमा बुझाएको थियो ।
युवा तथा खेलकुद मन्त्री विश्वकर्माले साउन २६ गतेको प्रतिनिधि सभाको बैठकमा राष्ट्रिय सभाबाट पारित भएर आएको सो विधेयक पेश गरेका थिए ।
शैद्धान्तिक छलफलसंगै संसदले प्रतिनिधि सभाको शिक्षा तथा स्वास्थ्य समितिमा विधेयकलाई छलफलका लागि पठाएको थियो ।
दफावार छलफलसंगै समितिले माघको अन्तिम साता विधेयकलाई सर्वसम्मत पारित गरेको थियो ।
संसदीय समितिबाट पारित सो विधेयक सोमबारको संसद बैठकमा पेश गर्दै पारित गर्ने तयारी छ । सोही अनुसार संसद सचिवालयले विधेयक सोमबारको बैठकमा पेश गर्ने कार्यसुचिमा राखेको छ ।
संघीय संरचना अनुसार खेलकुदलाई व्यवस्थित गर्न विधेयक उपयोगी हुने सरकारको दाबी छ ।
विधेयकले मुलभुत रुपमा राष्ट्रिय खेलकुद परिषद् (राखेप) सदस्य सचिवको अधिकार कटौती गर्दै मन्त्रालयको भूमिकालाई बढाएको छ । यस्तै, सदस्य सचिवको छनोट प्रक्रियामा समेत नयाँ मापदण्ड तयार गरेको छ ।
नयाँ विधेकयले खेलकुद संघमा राखेपका कर्मचारीलाई निषेध गर्दै खेलकुद संघहरुमा एक व्यक्ति एक पदमा दुई पटक भन्दा बढी बस्न नपाईने प्रावधान राखेको छ ।
राष्ट्रिय तथा अन्तराष्ट्रिय खेलाडीको परिभाषालाई विधेयकमै परिभाषित गर्दै विधेयकले भलिबललाई राष्ट्रिय खेलको मान्यता दिने निर्णय गरेको छ ।
