काठमाडौं । वेष्ट इण्डिजका विस्फोटक ब्याट्सम्यान क्रिस गेलले नेपाली क्रिकेट समर्थकलाई 'गेल धमाका' हेर्न तयार रहन आग्रह गरेका छन् ।
चौथो संस्करणको एभरेष्ट प्रिमियर लिग (ईपीएल) का लागि पोखरा राइनोजमा अनुबन्ध भएपछि गेलले नेपाली समर्थकलाई गेल धमाकाका लागि तयार रहन बताएका हुन् ।
'के छ नेपाल । म क्रिस गेल युनिभर्स बोस । सन् २०२० मा म एभरेष्ट प्रिमियर लिगका लागि नेपाल भ्रमण गर्दैछु,' गेलले भनेका छन्, 'आउनु होस् मेरो टिम पोखरालाई समर्थन गर्नुहोस । 'नेपाल गेल स्ट्रोमको लागि तयार छ । यो निकै ड्यासिङ हुनेछ । चाडै भेटौला नेपाल ।'
ईपीएल चैत १ गतेदेखि १५ गतेसम्म टियु क्रिकेट मैदानमा हुनेछ । र, पोखराले गेललाई आइकनिक खेलाडीको रुपमा अनुबन्ध गरेको जनाएको छ ।
गेल ईपीएलका लागि मार्च १२ मा नेपाल आउने छन् । इन्डियन प्रिमियर लिग (आईपीएल) को खेल तालिका अनुसार गेलले खेल्न खेलको तय हुनेछ । गेल किङ्स इलाभेन पन्जाबबाट आईपीएल खेल्ने गर्छन् ।
