बाँके । वडा नम्बर १७ र २३ नम्बरले नेपालगन्जमा जारी युनाइटेड ग्रुप दोस्रो अन्तर वडास्तरीय क्रिकेट प्रतियोगितामा जित हासिल गरेका छन् ।
मंगलबार १७ नम्बर वडाले ७ नम्बर वडालाई ३८ रनले पराजित गरेको छ । अर्को खेलमा २३ नम्बर वडाले १२ नम्बरलाई १३ रनले हरायो ।
मंगलबार प्रसाद उच्च माविको खेल मैदानमा टस जितेर ब्याटिङ गरेको १७ नम्बर वडाले १९ ओभरमा १ सय ५९ रन बनाएको थियो । टोलीका लागि हुसेन शेखले ५२ रन र बिमलले २४ रन बनाए । ७ नम्बरका शुसान्त श्रेष्ठले ३ विकेट, फर्दिन खान र कलिम राईले २–२ विकेट लिए ।
जवाफी ब्याटिङमा ७ नम्बरले १ सय २१ रनमा अलआउट भयो । टोलीका लागि अनुर्दिन अन्सारीले ३१ रन, हुसेन आलम अन्सारीले १४ र सकिल साहले १२ रन बनाए । १७ नम्बरका हुसेन शेख र सुफियान नाउँले ३–३ विकेट लिएका थिए ।
अनुपम सिहले २ विकेट लिए । खेलमा हुसेन म्यान अफ द म्याच, सुफियान नाउँले म्याजिक मुभमेन्टको पुरस्कार जिते ।
यसैगरी मंगलप्रसाद माविमा भएको पहिलो खेलमा २३ नम्बर वडाले १२ नम्बरलाई १३ रनले हराएको छ ।
खेलको सुरुवाती व्याटिङ गरेको वडा नम्बर २३ ले १९.५ ओभरमा १ सय १६ रन बनाएको थियो ।
जवाफी व्याटिङमा उत्रेको वडा नम्बर १२ नम्बर वडाले ले २० ओभर खेलेर १ सय ३ रन बनाउन सक्यो ।
टस जितेर ब्याटिङ गरेको २३ नम्बरका लागि मोहम्मद अनिसले १९ रन, सद्धाम शेख र साहिद अन्सारीले १४–१४ रन बनाए । १२ नम्बरका बिपुल शर्माले सर्वाधिक ४ विकेट र सुनिल खडकाले २ विकेट लिए ।
जवाफी ब्याटिङमा १२ नम्बरका लागि बिपुलले ३० रन, उत्तम रोकाले २३ रन र सुनिल खडकाले १९ रन जोडे । २३ नम्बरका सकिर शेख, नास्मिुल्लाह शेख र अकरम शेखले समान २–२ विकेट लिएका थिए । खेलमा साकिर शेख म्यान अफ द म्याच, नास्मिुल्लाह म्याजिक मुभमेन्टको पुरस्कार जित्न सफल भए ।
मंगलबार उत्कृष्ट घोषित भएका खेलाडीलाई वडा नम्बर ७ का वडाअध्यक्ष जुम्मन खाँ, ग्रुप अफ १६ का अध्यक्ष विष्णु अर्याललगायतले पुरस्कार दिएका थिए ।
