काठमाडौं । नेपालको क्यान-११ ले मलेसिया-११ विरुद्धको दोस्रो मैत्रीपूर्ण एकदिवसीय क्रिकेटमा फराकिलो जित हात पारेको छ ।
मंगलबार भएको दोस्रो खेलमा क्यान-११ ले मलेसियालाई १ सय ७२ रनले हराएको हो ।
पोखरा रंगशालामा क्यानले दिएको २ सय ९१ रनको लक्ष्य पछ्याएको मलेसिया २८ ओभर ४ बलमा अलआउट हुँदै १ सय २० रनमा समेटियो । उसका शेद अजिजले सर्वाधिक २८ रन बनाए ।
यस्तै भुसन सेभले २४, भिरन्दीप सिंहले २३, अहमद अरिफले १९ रन बनाउनु बाहेक अन्य खेलाडीले दोहोरो अंक छुन सकेनन् ।
मलेसियालाई सस्तैमा समेट्न किशोर महतो र ललित राजवंशीले समान ३/३ विकेट लिए । यस्तै सुशन भारीले २ तथा कमल सिंह ऐरी र पवन सर्राफले समान १/१ विकेट लिए ।
यस अघि टस हारेर पहिले ब्याटिङ गरेको क्यान-११ ले निर्धारित ५० ओभरमा ७ विकेट गुमाएर २ सय ९० रन बनाएको थियो ।
क्यानको लागि कप्तान रोहित कुमार पौडेलले सर्वाधिक ५७ रनको अर्धशतकीय इनिङ्स खेल्दै रिटायर्ड भए । यस्तै ज्ञानेन्द्र मल्लले ५४ रन बनाउँदा रिटायर्ड भए ।
यस्तै सुबास खकुरेल ४८ रनमा आउट भए । लोकेश बमले ३४, बिनोद भण्डारीले २१ र सुनिल धमलाले २४ रनको योगदान दिए ।
खेलमा किशोर महतो प्लेयर अफ दि म्याच चुनिए ।
सोमबार भएको पहिलो मैत्रीपूर्ण खेलमा क्यान-११ ले १ सय ३४ रनको जित निकालेको थियो ।
विश्व क्रिकेट लिग-२ अन्तर्गत अमेरिका र ओमानसँगको सिरिजका लागि अहिले नेपाली टिमले पोखरामा अभ्यास गरिरहेको छ ।
-1734966939.jpeg)
