काठमाडौं । १३ औं दक्षिण एसियाली खेलकुद प्रतियोगिताको औपचारिक उद्घाटन सम्पन्न भएको छ ।
नेपालले तेस्रो पटक आयोजना गरेको सागको राष्ट्रपति विद्यादेवी भण्डारीले औपचारिक उद्घाटन गरेकी हुन् ।
‘१३ औं दक्षिण एसियाली खेलकुद प्रतियोगिता औपचारिक रुपमा उद्घाटन भएको घोषणा गर्छु ।’ उद्घाटन सत्रलाई सम्बोधन गर्दै भण्डारीले भनिन् ।
सागको उद्घाटन राष्ट्र प्रमुखबाट गर्ने प्रचलन रहेको छ । सोही अनुसार राष्ट्रपति भण्डारी प्रतियोगिताको उद्घाटन गरेकी हुन् ।
राष्ट्रपतिको घोषणासंगै दक्षिण एसियाली खेलकुदको महाकुम्भ मेलाको औपचारिक रुपमा सुरु भएको छ ।
दक्षिण एसियाका ७ राष्ट्रले सहभागीता जनाउने प्रतियोगिताको १३ औं संस्करण काठमाडौं, पोखरा र जनकपुरमा सञ्चालन हुनेछ । सहभागी देशले कुल २६ खेलका विभिन्न स्पर्धामा आफ्नो चुनौती प्रस्तुत गर्नेछन् ।
नेपालले तेस्रो पटक सागको आयोजना गरेको हो । सन् १९८४ मा नेपालबाट सुरु भएको सागको दोस्रो संस्करण सन् १९९९ मा काठमाडौंमा भएको थियो ।
सन् २०१६ मा भारतको गुहाटी र सिलोङ भएको सागबाट नेपालले १३ औं संस्करण आयोजना गर्ने जिम्मेवारी लिएको थियो । प्रत्येक दुई बर्षमा आयोजना हुने प्रतियोगिता नेपालले निर्धारित मितिमा आयोजना गर्न सकेन ।
नेपालले तेस्रो तथा अन्तिम पटक सारिएको मितिमा प्रतियोगिता सञ्चालन गर्न लागेको हो ।
सोही अनुसार काठमाडौंको त्रिपुरेश्वरस्थित दशरथ रंंगशालामा एक भब्य कार्यक्रमका बीच प्रतियोगिताको उद्घाटन भएको हो ।
कार्यक्रमको सुरुमा स्वागत मन्तव्य राख्दै दक्षिण एसियाली ओलम्पिक कमिटिका अध्यक्ष जीवनराम श्रेष्ठले प्रतियोगितामा भाग लिन सात देशबाट आएका खेलाडी तथा अफिसियललाई शुभकामना दिए ।
राष्ट्रिय खेलकुद परिषद् (राखेप)का सदस्य सचिव रमेश सिलवालले नेपालले ठुला प्रतियोगिताको आयोजना गर्न सक्छ भन्ने सन्देश सागले दिन सफल भएको बताए । उनले सन् २०२० मा नेपालले मनाउन लागेको पर्यटन बर्षलाई सफल बनाउन साग सहयोगी हुने धारणा राखे ।
युवा तथा खेलकुद मन्त्री जगत विश्वकर्मा र उपप्रधान तथा रक्षामन्त्री ईश्वर पोखरेलले प्रतियोगिताको सफल आयोजनाको शुभकामना दिएका थिए ।
कीर्तिमानी तेक्वान्दो खेलाडी दिपक विष्टले सागको दिप प्रज्वलन गरेका थिए भने क्रिकेटका पुर्व कप्तान पारस खड्काले खेलाडीको तर्फबाट खपथ खाएका थिए । यस्तै दिपक थापाले रेफ्री तथा निर्णायकको तर्फबाट शपथ लिएका थिए ।
सागमा भारत्तोलनका एक मात्र स्वर्णधारी ओलम्पियन कमलबहादुर अधिकारीले मार्चपासमा नेपालको झण्डा बोकेका थिए ।
उद्घाटन सत्रमा नेपालको कला, संस्कृति र पहिचान झल्कने विभिन्न सांस्कृति कार्यक्रम प्रस्तुत गरिएको थियो । साथै प्रकाशको प्रर्दशनी तथा आतिशबाजीले कार्यक्रमलाई भब्य बनाएको थियो ।
नेपालमा सञ्चालन भएको साग मंसिर १५ बाट सुरु भएर २४ गतेसम्म सञ्चालन हुनेछ ।
