काठमाडौं । अखिल नेपाल फुटबल संघ एन्फाले विदेशी नागरिकलाई नेपालको प्रतिनिधिको रुपमा विश्व फुटबल महासंघ फिफाको कंग्रेस बैठकमा सहभागी गराईएको तथ्य सार्वजनीक भएको छ ।
एन्फाले जर्मन नागरिक नविन पाण्डेलाई नेपाल प्रतिनिधिको रुपमा फिफा कंग्रेस बैठकमा सहभागी गराएको हो । फिफा कंग्रेस बैठकमा प्रत्येक देशमा ३ जना प्रतिनिधि सहभागी हुने व्यवस्था छ । सोही आधारमा एन्फा अध्यक्ष कर्माछिरिङ शेर्पाले आफ्ना सल्लाहकार समेत रहेका जर्मन नागरिक पाण्डेलाई बैठकमा नेपालको प्रतिनिधिको रुपमा सहभागी गराएका छन् ।
रुसको मस्कोमा जुन १३ मा बसेको फिफा कंग्रेसको ६८ औं बैठकमा अध्यक्ष शेर्पासंगै महासचिव इन्द्रमान तुलाधर र पाण्डे सहभागी भएका थिए । सोही बैठकले सन् २०२६ को विश्वकप क्यानडा, मेक्सिको र संयुक्त राज्य अमेरिकाले गर्ने निर्णय गरेको थियो । विश्वकप आयोजनाकालागि भएको मतदानमा नेपालबाट अध्यक्ष शेर्पाले भोट हालेका थिए । शेर्पा र तुलाधरले मतदान नगर्ने स्थितीमा मतदानको अधिकार पाण्डेले प्राप्त गर्ने थिए ।
देशबाट प्रतिनिधित्व हुने विश्व फुटबलको सर्वोच्व निकाय फिफामा विदेशी प्रतिनिधिलाई समावेश गराएर एन्फाले गम्भीर त्रुटी गरेको छ । एन्फा अध्यक्षमा निर्वाचित भएलगत्तै शेर्पाले जर्मन नागरिक पाण्डेलाई आफ्नो सल्लाहकार रहने गरि अन्तराष्ट्रिय सम्बन्ध प्रमुखमा नियुक्त गरेका थिए ।
एन्फा कार्यसमितिमा केन्द्रिय सदस्यहरुको विरोधका बाबजुत अध्यक्ष शेर्पाले फिफा कांग्रेसको बैठककालागि पाण्डेको नाममा निर्णय गराएका थिए । एन्फा अध्यक्ष शेर्पा नेतृत्वको हिमालयन शेर्पा क्लबमा रहेका पाण्डे अखिल नेपाल फुटबल संघको निर्वाचनमा शेर्पाको पक्षमा सक्रिय भएर लागेका थिए ।
एन्फा अध्यक्ष शेर्पाले मतदान आफुले गर्ने भएकाले प्रतिनिधिको बिषयले केही फरक नपर्ने खेलपाटीलाई बताए । फुटबल विकास गर्न छाडेर ब्यक्ति बिशेषको कुरा गर्न राम्रो नहुने उनको भनाई छ ।
शेर्पा एन्फा नेतृत्वमा निर्वाचित भएलगत्तै पाण्डेलाई अन्तराष्ट्रिय सम्बन्ध प्रमुखमा समेत नियुक्त गरेका थिए । सो बिषयलाई लिएर एन्फा कार्यसमितिमा चर्को आलोचना भएको नाम नबताउने शर्तमा एक एन्फा पदाधिकारीले जानकारी दिए ।
खेलकुद विकास ऐनमा विदेशी खेलाडी, प्रशिक्षक र अधिकारीलाई कुनैपनि पदमा नियुक्त गर्दा राष्ट्रिय खेलकुद परिषद राखेप र खेलकुद मन्त्रालयको सिफारिसमा परराष्ट्रमन्त्रालयसंग स्विकृत लिनुपर्ने संवैधानिक व्यवस्था छ । तर, पाण्डेको नियुक्तीको बिषयमा एन्फाले राज्यसंग कुनै स्विकृती लिएको छैन् ।
राखेप खेलकुद विभाग प्रमुख कुलबहादुर थापाले पाण्डेको बिषयमा परिषदलाई कुनै जानकारी नभएको बताए । कुनैपनि विदेशी नागरिकलाई राखेप र मन्त्रालयको सिफारिसमा परराष्ट्रबाट स्विकृती नलिई काम लगाउन नपाउने भन्दै उनले पाण्डेको बिषयमा थप अनुसन्धान आवश्यक रहेको बताए ।
एन्फा प्रवक्ता किरण राईले कार्यसमितिको निर्णय अनुसार पाण्डेलाई फिफा बैठकमा लगिएको बताउदै एन्फा प्रतिनिधिको रुपमा उनी सहभागी भएको स्विकार गरे । ‘अन्तराष्ट्रिय सम्बन्ध प्रमुखको हिसावमा फिफा कंग्रेस बैठकमा पाण्डेलाई सहभागी गराईएको हो ।’ उनले भने ।
