काठमाडौं । नेपालमा पहिलो पटक आयोजना भएको पाँचौ संस्करणको एसियन कन्फेडेरेसन (एभीसी) सेन्ट्रल जोन मेन्स भलिबल प्रतियोगिताको उपाधि कीर्गीस्तानले जित्यो ।
नेपाल भलिबल संघको आयोजनामा साउन ३२ देखि भदौ ८ गतेसम्म सञ्चालन भएको प्रतियोगितामा नेपाल, बंगलादेश, माल्दिभ्स, अफगानिस्तान, कीर्गीस्तान, तुर्केमिनिस्तान र उज्वेकिस्तानसहित ७ टोली सहभागी थिए ।
लगनखेलस्थित सैनिक शारीरिक तालिम तथा खेलकुद केन्द्रमा भएको प्रतियोगितामा दर्शकलाई निशुल्क हेर्ने व्यवस्था मिलाइएको थियो ।
उद्घाटन खेलमा घरेलु टिम नेपालले किर्गीस्तानसंग खेलेको थियो । सो खेल हेर्न उल्लेख्य समर्थक कर्भडहलसम्म पुगेका थिए । दर्शकलाई ठाउँ भेट्नै हम्मेहम्मे परेको थियो ।
एकहिसाबले आर्मीको कभर्डहल दर्शकले भरिए । खेल नेपालले हार्न पुग्यो तर प्रतियोगिता अवधिभर समर्थकले नेपाली टिमलाई साथ दिईरहे । हौसला बढाईरहे । तर, नतिजा नेपालका लागि निराशाजनक रह्यो । समूह चरणका दुवै खेल हार्दै नेपाली टिम प्रतियोगिताबाट बाहिरिन पुग्यो ।
नतिजाको हिसाबमा खल्लो देखिएपनि नेपाल भलिबल संघले व्यवस्थापनमा सुधार गर्न सफल रह्यो । पहिलो पटक नेपालमा आयोजना भएको प्रतियोगिता भव्यताको साथ सम्पन्न भयो ।
प्रतियोगितामा सहभागी हुन विदेशबाट आएका सबैले व्यवस्थापन राम्रो भएको प्रतिक्रिया दिए । भलिबल संघले समेत सबै क्षमता प्रयोग गरेर प्रतियोगितालाई सफल बनाउने कोशिश गर्यो ।
एभीसी सेन्ट्रल जोनमा टेक्निकल कमिटिका सदस्य रहेका न्यु डाइमण्ड एकेडेमीका प्रशिक्षक कुमार राईका अनुसार संघले धेरै राम्रो प्रतियोगिताको आयोजना गरेको बताउँछन् ।
‘भलिबल संघले धेरै राम्रो आयोजना गरेको छ । आफुले गर्नसक्ने जति सबै गरेको छ । र, संघलाई धन्यवाद भन्न चाहन्छु ।’ प्रशिक्षक राईले भने ।
प्रतियोगिता आयोजनामा अतिथिको सत्कार र खेल व्यवस्थापनको पक्ष तारिफ योग्य देखियो । उद्घाटन शत्रको दिनलाई छाडेर संघका पदाधिकारी तथा व्यवस्थापन कम्पनीले प्रतियोगिताको राम्रो व्यवस्थापन गरे । विदेशबाट आएका पाहुना, अतिथी, दर्शक र खेलाडीलाई गर्ने व्यवहार निकै प्रशंसनिय थियो ।
नेपालमा पहिलो पटक आयोजना भएको एभीसी सेन्ट्रल जोनको तयारी र व्यवस्थापन देखेर विदेशी पाहुना पनि मख्ख थिए ।
तर केही घटना खल्लो देखिए ।
सुरुवाती दिनको व्यवस्थापन निकै फितलो देखिएको थियो । पहिलो दिनमा घरेलु टोलीको खेलमा दर्शकहरु थामिनसक्नु थिए । क्षमता भन्दा बढी दर्शकलाई कभर्डहलमा प्रवेश गराईएको थियो । जसले सूरुको दिनमा व्यवस्थापनको पाटोलाई कुरुप बनाएको थियो ।
दर्शकदिर्घाका लागि कम क्षेत्र दिदाँ दर्शकहरु भेटिएका सबै ठाउँमा पसेर खेल हेर्न भ्याए । कोहीले उभिएरै प्रतियोगिताको आनन्द लिए, केही भुइँमै बसे ।
कर्भडहलको ढोकादेखि लिएर भित्र हलसम्म दर्शक पेलिएरै खेल हेर्न बाध्य भए ।
यतिमात्र हैन, मिडिया क्षेत्र, भीआईपी क्षेत्र भनेर छुट्याइएको ठाउँ पनि दर्शकले कब्जा गरेका थिए । पहिलो दिनमा आयोजक र व्यवस्थापन चुकेको दिखियो ।
कर्भडहलको क्षमता अनुसार दर्शकलाई पास उपलब्ध गराएको भए व्यवस्थापन चुस्त देखिने थियो । त्रिपुरेश्वरको कभर्डहललाई तयार गरेर टिकट शुल्कनै उठाउन सके संघलाई समेत आर्थिक रुपमा केही राहत मिल्ने थियो ।
खेल चल्दै गर्दा कभर्डहललमा कुकुर समेत पस्न पुगेको थियो ।
एकछेउमा बसेका बंगलादेश कमिटीका सदस्यले भनिरहेका थिए, ‘वो देखो कुत्ता ! वो तो अन्दर ही आ गया । देखो फोटो लेलो और न्युजपेपरमे डाल्दो ।’
यो अलि लाजमर्दो बिषय बनेको थियो । साना कुराले व्यवस्थापन सुन्दर देखिन्छ । तीनै साना कुरा बिग्रदा फितलो ।
फितलो देखिएका तीनै साना कुरामा ध्यान दिन सके नेपालले आयोजना गर्ने अन्तराष्ट्रिय खेल स्पर्धाहरु अझ उत्कृष्ट बन्न सक्ने देखिएको छ ।
