फिन्चको शतकमा इंग्ल्याण्डलाई मध्यम लक्ष्य

एजेन्सी । इंग्ल्याण्डमा जारी १२ औं संस्करणको आईसीसी एकदिवसीय विश्वकप क्रिकेटमा अष्ट्रेलियाले घरेलु टोलीलाई जितका लागि २८६ रनको मध्यम लक्ष्य दिएको छ ।

लर्ड्स क्रिकेट मैदानमा टस हारेर पहिले ब्याटिङ गरेको अष्ट्रेलियाले ५० ओभरमा ७ विकेट गुमाएर २८५ रन बनायो ।

अष्ट्रेलियाका लागि कप्तान आरोन फिन्चले १०० रनको शतकीय इनिङ्स खेले । ११६ बलमा फिन्चले ११ चौका र २ छक्का प्रहार गरे । फिन्चको यो जारी विश्वकपमा दोस्रो शतक हो ।

यस्तै डेभिड वार्नरले ५३ रनको अर्धशतकीय इनिङ्स खेले । त्यस्तै एलेक्स केरी र स्टेभेन स्मिथले ३८/३८ रन बनाए ।

इंग्ल्याण्डका लागि क्रिस वोक्सले २ विकेट लिए । यस्तै जोफ्रा आर्चर, मार्क वुड, बेन स्टोक्स र मोइन अलीले एक एक विकेट लिए ।

आज दुवै टिम जित निकाल्ने लक्ष्यसहित मैदान उत्रिएका छन् ।  दुवै टोली जित निकाल्दै सेमिफाइनल पुग्ने सम्भावनालाई बलियो बनाउन चाहन्छ । त्यसैले दुई हेबिवेट राष्ट्रको भिडन्त रोमान्चक हुने अनुमान गरिएको छ । 

घरेलु टोली इंग्ल्याण्ड अष्ट्रेलियालाई हराएर तालिका को दोस्रो स्थानमा उक्लन चाहन्छ । ६ खेलबाट ८ अंक जोडेको इंग्ल्याण्ड चौंथो स्थानमा छ । 

इंग्ल्याण्डलाई घरेलु समर्थकको साथ हुनेछ । तर, इंग्ल्याण्डलाई अष्ट्रेलियाविरुद्ध जित निकाल्न त्यति सहज भने हुनेछैन ।  इंग्ल्याण्ड ओपनर जासन रोयविना मैदान उत्रनेछ ।  रोय चोटका कारण मैदान बाहिर रहेका छन् । 

यता, अष्ट्रेलिया घरेलु टोलीलाई हराउँदै शीर्ष स्थानमा उक्लन चाहन्छ । ६ खेलबाट १० अंक जोडेको अष्ट्रेलिया दोस्रो स्थानमा छ ।  अष्ट्रेलिया शीर्ष स्थानको न्युजिल्याण्डभन्दा मात्र १ अंकले पछि छ । 

घरेलु टोलीविरुद्ध अष्ट्रेलियालाई चोटको चिन्ता छैन । सबै खेलाडीहरु लयमा देखिएका छन् ।  त्यसैले अष्ट्रेलिया जितका लागि खेल्नेछ ।   

दुईबीचको पछिल्लो पाँच भेटमा भने इंग्ल्याण्ड बलियो देखिएको छ । पछिल्लो पाँच भेटमा इंग्ल्याण्डले पाँचै खेल जितेको छ । इंग्ल्याण्ड भ्रमणको क्रममा अष्ट्रेलियाले पाँच खेलको सिरिज गुमाएको थियो ।

तर, अष्ट्रेलिया उक्त हारको बदला लिने योजनामा हुनेछन् ।