अफगानिस्तानविरुद्ध रुट र बेरस्टोको अर्धशतक

एजेन्सी । इंग्ल्याण्डमा जारी १२ औं संस्करणको आईसीसी एकदिवसीय विश्वकप क्रिकेटमा अहिले उपाधि दाबेदार इंग्ल्याण्ड र अफगानिस्तानबीच प्रतिस्पर्धा भईरहेको छ  । 

म्यानचेस्टरको ओल्ड ट्राफोर्डमा अफगानिस्तानविरुद्ध इंग्ल्याण्डले टस जितेर पहिले ब्याटिङ गरिरहेको छ । अफगानिस्तानविरुद्ध पहिले ब्याटिङ गरिरहेको इंग्ल्याण्डका दुई खेलाडीले अर्धशतक पुरा गरेका छन् । 

इंग्ल्याण्डका लागि जोय रुट र जोनी बेरस्टोले अर्धशतक बनाएका हुन् । रुट ५१ रन बनाएर क्रिजमा रहेका छन् । बेरस्टो भने ९० रन बनाएर आउट भए ।

इंग्ल्याण्डले ३४ ओभरको खेल सकिदा २ विकेट गुमाएर १९६ रन जोडेको छ ।

आज इंग्ल्याण्ड अफगानिस्तानलाई पराजित गर्दै चौंथो जित निकाल्ने लक्ष्यसहित मैदान उत्रिएको छ । ४ खेलमा ३ जित र १ हार व्यहोरेको इंग्ल्याण्डको ६ अंक रहेको छ । 

जारी विश्वकपमा अफगानिस्तान जित निकाल्न नसक्ने एक्लो टिम हो । ४ खेलमा अफगानिस्तानले ४ खेल गुमाएको छ । तर, इंग्ल्याण्डलाई हराउँदै अफगानिस्तान पहिलो जित निकाल्न चाहन्छ ।