पहिलोपटक आमनेसामने हुँदै मेस्सी र यामाल

काठमाडौं । फुटबल इतिहासकै महान खेलाडी मानिने लियोनल मेस्सी र बार्सिलोनामा उनको उत्तराधिकारीका रूपमा हेरिएका युवा स्टार लामिन यामाल पहिलोपटक मैदानमा आमनेसामने हुँदैछन्।

आइतबार हुने फिफा विश्वकप फाइनलमा अर्जेन्टिना र स्पेन भिड्दा ३९ वर्षीय मेस्सी र १९ वर्षीय यामालबीचको बहुप्रतीक्षित प्रतिस्पर्धा हेर्न पाइनेछ।

उमेरमा २० वर्षको अन्तर भए पनि मेस्सीको निरन्तर उत्कृष्ट प्रदर्शन र यामालको असाधारण प्रतिभाका कारण दुवै खेलाडी विश्व फुटबलको सबैभन्दा ठूलो मञ्चमा एकैपटक उपस्थित हुन सफल भएका छन्।

यद्यपि, उनीहरूको भेट मैदानमा हुन लागेको यो पहिलो अवसर भए पनि उनीहरूको सम्बन्ध भने करिब दुई दशकअघि नै सुरु भएको थियो।

सन् २००७ मा २० वर्षीय मेस्सी बार्सिलोनाको नियमित खेलाडी बन्दै गर्दा यामाल केवल पाँच महिनाका थिए। त्यसबेला फोटोग्राफर जोआन मोनफोर्टले खिचेका केही तस्वीरमा मेस्सीले शिशु यामाललाई काखमा लिएर नुहाइदिइरहेको देखिन्छ।

यामालले स्पेनलाई युरो २०२४ को उपाधि जिताउन महत्वपूर्ण भूमिका खेलेपछि ती तस्वीरहरू पुनः चर्चामा आएका थिए। उनका बुबाले तस्वीर सामाजिक सञ्जालमा सार्वजनिक गर्दै लेखेका थिए, “दुई महान खेलाडीको सुरुआत।”

मोनफोर्टले उक्त संयोगलाई भाग्यको चमत्कारका रूपमा व्याख्या गरेका छन्।

“यो भाग्यको वास्तविक चमत्कार हो। कुनै चलचित्रमा यस्तो कथा लेखिएको भए पनि विश्वास गर्न गाह्रो हुन्थ्यो,” उनले भनेका छन्।

उक्त फोटोसुट बार्सिलोनाको क्याम्प नोउस्थित अवे ड्रेसिङ रुममा गरिएको थियो। क्याटलान पत्रिका स्पोर्ट्स बार्सिलोनाको तत्कालीन जर्सी प्रायोजक र युनिसेफले आयोजना गरेको प्रतियोगिता जितेपछि यामालको परिवार फोटोसुटमा सहभागी भएको थियो।

छनोट भएका शिशुहरूको बार्सिलोनाका पहिलो टोलीका खेलाडीसँग तस्वीर खिचाइने कार्यक्रमअन्तर्गत यामाललाई संयोगवश मेस्सीसँग जोडी बनाइएको थियो।

“सन् २०२४ मा मेरा एक साथीले यामालका बुबाले तस्वीर इन्स्टाग्राममा राखेको बताएपछि मात्र त्यो बच्चा यामाल भएको थाहा पाएँ,” मोनफोर्टले भने।

उनका अनुसार मेस्सी स्वभावले निकै लजालु थिए र सुरुमा शिशुलाई कसरी समात्ने भन्नेमा अलमलिएका थिए। तर यामाल निकै खुसी र हँसिलो बच्चा भएकाले केही समयमै मेस्सी परिस्थितिमा सहज बनेका थिए।

१९ वर्षको उमेरमै मेस्सीभन्दा अगाडि यामाल

मेस्सीले १९ वर्षको उमेरसम्म आफ्नो व्यावसायिक करियरमा ११ गोल गरेका थिए। त्यस अवधिमा उनले बार्सिलोनाबाट एकपटक ला लिगा र एकपटक यूईएफए च्याम्पियन्स लिग जितेका थिए।

यसै साता १९ वर्ष पूरा गरेका यामालले भने अहिलेसम्म ५६ गोल गरिसकेका छन्। उनले बार्सिलोनाबाट तीनपटक ला लिगा, एकपटक कोपा डेल रे तथा स्पेनबाट युरो २०२४ को उपाधि जितिसकेका छन्।

यामाल वास्तवमा उनको थर होइन, दोस्रो नाम हो। उनको पूरा नाम लामिन यामाल नासराउई एबाना हो। उनले बार्सिलोना र स्पेनको जर्सीमा ‘लामिन यामाल’ लेखाउनु आफ्ना परिवारलाई कठिन समयमा सहयोग गर्ने दुई व्यक्तिप्रतिको सम्मानका रूपमा लिने गरेका छन्।

स्पेनी सञ्चारमाध्यमहरूका अनुसार आर्थिक कठिनाइका बेला परिवारलाई सहयोग गर्ने दुई साथीको नामबाट उनको नाम राखिएको हो।

लामिन अरबी भाषामा इमानदार वा विश्वासयोग्य भन्ने अर्थमा प्रयोग हुन्छ भने यामाल ‘जमाल’ शब्दको अर्को रूप हो, जसको अर्थ सुन्दरता वा आकर्षण हुन्छ।

यामाल बार्सिलोनाबाट करिब २० माइल उत्तरमा रहेको कामदार वर्गको बस्ती रोकाफोन्डामा हुर्किएका हुन्।

यामालले प्रतियोगिताका क्रममा दिएको अन्तर्वार्तामा आफ्ना अभिभावकको संघर्षप्रति भावुक हुँदै भनेका थिए, “मेरी आमा र बुबाले मेरो लागि जे गर्नुभयो, म आफ्नै सन्तानबाहेक अरू कसैका लागि त्यति गर्न सक्दिनथेँ। पैसा नभएको अवस्थामा बच्चालाई फुटबल खेलाउन निकै कठिन हुन्छ। मेरा अभिभावकले त्यो सबै सम्भव बनाउनुभयो। म उहाँहरूको ऋण कहिल्यै तिर्न सक्दिनँ।”

अब दुई फरक पुस्ताका यी दुई बार्सिलोना स्टार विश्वकप उपाधिका लागि प्रतिस्पर्धा गर्दैछन्। एकातिर आफ्नो महान विरासतलाई अझ बलियो बनाउने लक्ष्यमा मेस्सी छन् भने अर्कोतिर विश्व फुटबलको नयाँ युगको नेतृत्व गर्न तयार यामाल छन्।