पराग अब राजस्थानको कप्तान

काठमाडौं। रियान पराग अब राजस्थान रोयल्सका नयाँ कप्तान बन्ने भएका छन्। इन्डियन प्रिमियर लिग (आईपीएल) २०२६ अघि राजस्थानले उनलाई कप्तानी सुम्पने निर्णय गरेको हो।

यसअघि टोलीका कप्तान रहेका सञ्जु सामसन चेन्नाई सुपर किंग्समा गएपछि राजस्थानले नयाँ कप्तान छनोट गरेको हो।

सामसन दुई अलराउन्डर रविन्द्र जडेजा र साम करनको सट्टामा चेन्नाई गएका हुन्। २४ वर्षीय परागले यसअघि पनि राजस्थानको कप्तानी गरिसकेका छन्। गत सिजन सामसन चोटका कारण आठ खेलमा बाहिर रहँदा परागले टोलीको नेतृत्व गरेका थिए।

ती आठमध्ये राजस्थानले दुई खेल मात्र जितेको थियो। यद्यपि, परागले व्यक्तिगत रूपमा राम्रो प्रदर्शन गर्दै ती खेलमा ३८.५७ को औसतमा रन बनाएका थिए। सो क्रममा उनले कोलकाता नाइट राइडर्सविरुद्ध इडेन गार्डेन्स मैदानमा करिअरकै उत्कृष्ट ९५ रन बनाएका थिए।

ईएसपीएनक्रिकइन्फोका अनुसार मुख्य प्रशिक्षक कुमार सङ्गकाराले केही खेलाडीसँग अन्तर्वार्ता लिएपछि परागलाई कप्तान बनाउने निर्णय गरेका हुन्।

यससँगै राजस्थानले नयाँ कप्तान र नयाँ मुख्य प्रशिक्षक पाउनेछ। प्रशिक्षक राहुल द्रविडले २०२५ सिजनपछि टोली छोडेका थिए। सो सिजन राजस्थान १४ खेलमध्ये चार जित मात्र निकाल्दै दोस्रो पुछारमा रहेको थियो।

२०१९ मा आईपीएलमा डेब्यु गरेका परागले सातै सिजन राजस्थानबाट खेलेका छन्। पछिल्ला दुई सिजनमा उनले टोलीका सबै खेल खेले।२०२४ सिजन उनको सबैभन्दा सफल रह्यो।

उनले ५७३ रन ५२.०९ को औसत र १४९.२१ को स्ट्राइकरेटमा बनाएका थिए। समग्रमा उनले राजस्थानका लागि ८४ खेल खेल्दै १५६६ रन बनाएका छन् र सात विकेट लिएका छन्।