भारतको सानदार जित, कोहली बने एकदिवसीय क्रिकेटका दोस्रो सर्वाधिक रनकर्ता
काठमाडौं। अस्ट्रेलियाविरुद्धको सिरिजअघि भारतीय क्रिकेटमा एउटा ठूलो प्रश्न थियो– रोहित शर्मा र विराट कोहलीले के २०२७ विश्वकपसम्म खेल्नेछन्?
पहिलो खेलमा दुवैजना असफल भएपछि त्यो प्रश्न अझ बलियो बन्यो। दोस्रो खेलमा रोहितले रन बनाए। तर, कोहली फेरि पनि रनविहीन रहे। तर, शनिबार तेस्रो तथा अन्तिम एकदिवसीय खेलमा दुवैले सानदार प्रदर्शन गरे। रोहितले शतक र कोहलीले अर्धशतक प्रहार गरे।
सिड्नीमा भएको खेलमा अस्ट्रेलियाले पहिले ब्याटिङ गर्दै २३६ रन बनायो। जवाफमा भारतले ११.३ ओभर बाँकी रहँदा ९ विकेटको जित हात पार्यो। कप्तान रोहित शर्मा १२१ रनमा अविजित रहे।
कोहली ८१ बलमा ७४ रनमा अविजित रहे। पहिलो दुई खेलमा ‘डक’मा आउट भएका कोहलीका लागि यो पुनरागमन विशेष रह्यो। भारतका ओपनर शुभमन गिल २४ रनमा आउट भएपछि रोहित–कोहली जोडीले १६८ रनको साझेदारी गरे र जित सुनिश्चित गरे।
यद्यपि, सिरिज अस्ट्रेलियाले २–१ ले जित्यो। रोहित म्यान अफ द म्याच र म्यान अफ द सिरिज दुवै घोषित भए। उनले तीन खेलमा जम्मा २०२ रन बनाए।
यो इनिङ्ससँगै कोहलीले एकदिवसीय क्रिकेटमा नयाँ माइलस्टोन हासिल गरे। खेलअघि उनका नाममा १४ हजार १७६ रन थियो। शनिबारको ७४ रनको इनिङ्स पछि उनले श्रीलंकाका महान् ब्याटर कुमार सङ्गकारा (१४ हजार २३४ रन) लाई पछि पार्दै बने एकदिवसीय क्रिकेट इतिहासका दोस्रो सर्वाधिक रनकर्ता बने।
कोहलीले यो उपलब्धि ३०५ खेलमा हासिल गरे। शीर्षस्थानमा भने अझै पनि सचिन तेन्दुलकर छन्, जसका नाममा १८ हजार ४२६ रन छन्। अस्ट्रेलियाका लागि ट्राभिस हेड र मिचेल मार्शले ६१ रनको साझेदारी गर्दै राम्रो सुरुआत गरे।
तर, त्यसपछि भारतीय बलरहरूले दबाब बनाउँदै गए। हर्षित राणाले ३९ रनमा ४ विकेट लिएर अस्ट्रेलियालाई २० बल बाँकी रहँदा समेटे। उनका शिकार बने, एलेक्स केरी, मिचेल वेन, कुपर कोनोली र जोश हेजलवुड।
मार्श ४१ रनमा आउट भए र म्याट रेनशले सर्वाधिक ५६ रन जोडे। भारतका लागि वाशिंगटन सुन्दरले २ विकेट लिए, जसले अस्ट्रेलियाको अन्तिम ५ विकेट ४७ रनभित्रै झारे।
यो जितसँगै भारतले सिरिज हार टार्न सकेन। तर, रोहित–कोहलीको पुनरागमनले आगामी अस्ट्रेलिया सिरिजअघि भारतीय टोलीलाई नयाँ आत्मविश्वास प्रदान गरेको छ।
