फुटबल छाडेर ओलम्पिकमा दौडिँदै मिखाइलो

काठमाडौं। एउटा समय युरोपका शीर्ष प्रतिभाशाली खेलाडीमा गनिने मिखाइलो मूद्रिकको भविष्य अहिले अनिश्चित छ।

जनवरी २०२३ मा चेल्सीले १०० मिलियन यूरो खर्च गरेर उनलाई टोलीमा ल्याएको थियो। छिटो गति, उत्कृष्ट ड्रिब्लिङ र प्रतिद्वन्दी डिफेन्डरहरूलाई आतंकित पार्ने क्षमताका कारण समर्थकहरूले उनीमाथि ठूलो आशा गरेका थिए। तर, डोपिङ आरोपले मूद्रिकको फुटबल करिअर अहिले अनिश्चित छ।

मूद्रिक अब फुटबल छोडेर स्प्रिन्टर बन्ने सोचमा छन्। उनी २०२८ को लस एन्जेल्स ओलम्पिकमा ट्र्याक एन्ड फील्ड प्रतिस्पर्धामा भाग लिने तयारी गर्दैछन्।

फुटबलमा डोपिङ उल्लंघनको आरोपसहित उनलाई एफएले अस्थायी रूपमा प्रतिबन्ध लगाएको छ। २४ वर्षको उमेरमा उनी फुटबलबाट बाहिरिएका छन्, अनुसन्धान पूरा नभएसम्म अनिश्चितकालीन प्रतिबन्धमा रहन्छन्। चेल्सीमा उनको स्थान असुरक्षित भएकोले उनी वैकल्पिक मार्ग खोज्न बाध्य भएका हुन्।

प्रिमियर लिगको डेब्यु खेलमा उनले ३६.६७ किमि/घण्टा गतिमा दौडेर सबैलाई प्रभावित गरेका थिए। अहिले उनी आफ्नो तीव्र गतिलाई ट्र्याकमा रूपान्तरण गर्न केन्द्रित छन्।

मूद्रिकले युक्रेनको राष्ट्रिय स्प्रिन्ट टोलीसँग अभ्यास सुरु गरिसकेका छन्। पूर्व ओलम्पियन प्रशिक्षकहरूको मार्गदर्शनमा उनी तीव्र प्रशिक्षण लिइरहेका छन्। उनको प्राकृतिक गति अत्यन्त दुर्लभ प्रतिभा हो। नियमित अभ्यासले उनलाई एथलेटिक्समा सफलता दिलाउन सक्ने विश्वास गरिएको छ।

तर, उनले रोजेको मार्ग सजिलो छैन। ओलम्पिकमा स्थान बनाउन मूद्रिकले पहिलो विश्व एथलेटिक्सले तोकेको छनोट मापदण्ड पूरा गर्नुपर्छ र २०२७ मा युक्रेनको ट्रायलमा उत्तीर्ण हुनुपर्छ। त्यसपछि मात्र उनी २०२८ लस एन्जेल्स ओलम्पिकको टिकट काट्न सक्षम हुनेछन्।

मूद्रिकको यो नयाँ यात्रा फुटबलको मैदानबाट स्प्रिन्टिङको ट्र्याकमा परिवर्तन भएको एक साहसिक कदम हो। यसले उनलाई अर्को ठूलो चुनौती र अवसरमा पुर्‍याउनेछ।