पहिलोपल्ट आर्सनलले ओपन प्लेबाट खायो गोल

काठमाडौं। इङ्लिस प्रिमियर लिगमा म्यानचेस्टर सिटीले एर्लिङ हालान्डको गोलमार्फत सुरुआती अग्रता लिएको थियो। तर, अन्तिम क्षणमा ग्याब्रिएल मार्टिनेलीको गोलले आर्सनललाई बराबरीमा फर्कायो।

आइतबार राति घरेलु मैदानमा भएको खेलमा नवौं मिनेटमै हालान्डले गोल गर्दै सिटीलाई अग्रता दिलाए। आफ्नै हाफबाट बल पाएर उनले टियानी राइन्डर्सलाई पास दिए। राइन्डर्सको पास डी–बक्सको छेउमा पाउँदै हालान्डले अघि बढ्दै प्रहार गर्दा जाली चुमाए।

आर्सनलले यो सिजनमा पहिलोपटक ओपन प्लेबाट गोल खानुपर्‍यो। २०२४ सेप्टेम्बरपछि पहिलो पटक आर्सनलले प्रिमियर लिगमा यति छिट्टै गोल पनि खाएको हो।

३२औं मिनेटमा आर्सनलले पहिलोपटक गोलका लागि प्रयास गर्‍यो। तर, ननी माडुकेको हेडिङ लक्ष्यमा लागेन। २०२१ अप्रिलपछि पहिलो पटक प्रिमियर लिगमा आर्सनलले खेलको आधा घण्टा पूरा हुँदासम्म गोलका लागि कुनै शट अन–टार्गेट गर्न सकेको थिएन।

पहिलो हाफ १–० ले पछि पर्दै समाप्त गर्‍यो आर्सनलले। तर, दोस्रो हाफको सुरुदेखि आक्रमक बन्यो। ४८औं मिनेटमा मार्टिन जुबिमेन्दीको प्रहार अलिक मात्र बाहिरियो।

अन्ततः थपिएको समयको तेस्रो मिनेटमा आर्सनलले बराबरी गोल निकाल्यो। एजको पासमा मार्टिनेलीले पहिलो टचमै गोल गर्दै खेल १–१ को बराबरी ल्याए।

५ खेलमा सबै जितेर १५ अंकसहित लिभरपुल शीर्ष स्थानमा छ। तीन जित र एक बराबरीसहित १० अंकसहित आर्सनल दोस्रो स्थानमा पुगेको छ। समान अंक टोटनह्याम र बोर्नमाउथको पनि छ। ५ खेलमा दुई जित र एक बराबरीसहित ७ अंकसहित सिटी नवौं स्थानमा छ।