अञ्जन भन्छन्- एन्फाले लिग चाँढो गर्दियोस्

काठमाडौं । नेपाली राष्ट्रिय फुटबल टोलीका स्टार फरवार्ड अञ्जन विष्टले देशमा फुटबल लिग नहुँदा बंगलादेश जानु परेको पीडा पोखेका छन्। ब्रदर्स युनियनसँग सम्झौता गर्दै ढाका पुगेका अञ्जनले फेसबुकमार्फत हृदयविदारक भाव व्यक्त गर्दै लेखेका छन्,‘दुई छाक टार्न र बाबाआमाको सपना पूरा गर्न बाध्यतावश अरूको देशमा छु।’

उनी राष्ट्रिय टोलीका सर्वाधिक गोलकर्ताको सूचीमा (१३) रहेका खेलाडी हुन्। राष्ट्रिय टोलीका फरवार्ड भएर पनि आफ्नै माटोमा खेल्ने ठाउँ नपाएको व्यथा अञ्जनको शब्दमा झल्किएको छ। उनले भनेका छन्,‘म यो देशको राष्ट्रिय फुटबल खेलाडी हुँ, तर धेरै वर्षदेखि नेपालमा लिग नहुँदा बाध्यतावश छिमेकी मुलुकको लिग खेल्न आउनुपरेको छ।’

अञ्जनसँगै राष्ट्रिय टोलीका अन्य तीन खेलाडी एरिक विष्ट, सनीश श्रेष्ठ र योगेश गुरुङ पनि बंगलादेश प्रिमियर लिग क्लब ब्रदर्स युनियनमा आबद्ध भएका छन्। अखिल नेपाल फुटबल संघ (एन्फा)ले करिब दुई वर्षदेखि शहीद स्मारक ‘ए’ डिभिजन लिग सञ्चालन गर्न नसकेपछि उनीहरू सबै ढाकाको मैदान धाउन बाध्य भएका हुन्।

नेपालका लागि हरि खड्का र निराजन रायमाझीसँगै समान १३ गोल गर्दै कीर्तिमान बनाइसकेका अञ्जनले आफ्नो पोस्टमा अझै भावुक हुँदै लेखेका छन्–

‘मेरो नेपाल आमा रोइरहेकी छिन्। देशमा क्रान्तिको ज्वाला दन्किरहेको छ, अञ्जान युवाहरू बलिदान दिइरहेका छन्। तर म चाहिँ अरूको देशमा खेल्न बाध्य छु। मलाई माफ गर्नुहोस्, मैले केही सहयोग गर्न सकिनँ।’

अञ्जनले आन्दोलनका क्रममा सहिद भएका युवाप्रति श्रद्धाञ्जली अर्पण गर्दै एन्फासँग तात्कालिक रूपमा घरेलु लिग पुनः सुरु गर्ने वातावरण बनाउन आग्रह गरेका छन्।

नेपालका फुटबल मैदान सुनसान भइरहँदा बंगलादेशको ढाकामा भने नेपाली खेलाडीहरूको भीड बाक्लिँदै गएको छ। अञ्जनको एक छाक टार्न अरूको देशमा छु भन्ने वाक्य मात्र व्यक्तिगत पीडा होइन, अहिलेको नेपाली फुटबलको सामूहिक दुःख बनेर गुञ्जिरहेको छ