हम्जा नेपाल आउने वा नआउने अझै निश्चित भएन

काठमाडौं। अगष्ट १३ देखि बंगलादेश राष्ट्रिय फुटबल टिमको अभ्यास सुरु भए पनि बसुन्धरा किङ्सले आफ्ना १० खेलाडी ढिलो छाडेकाले आइतबार बेलुकी मात्र पूर्ण टोलीले पहिलोपटक प्रशिक्षण पाएको छ। 

तर, सोमबारको अभ्यास सत्रभन्दा बढी इङ्ल्यान्डमा खेल्दै आएका हम्जा देवान चौधरीको विषयमै केन्द्रित रह्यो। बंगलादेशले आगामी सेप्टेम्बर ६ र ९ मा त्रिपुरेश्वरस्थित दशरथ रंगशालामा नेपालसँग दुईवटा फिफा मैत्रीपूर्ण खेल खेल्नेछ।

त्यसकै तयारीस्वरूप टोली ३ सेप्टेम्बरमा नेपाल प्रस्थान गर्नेछ। तर, लेस्टर सिटीबाट खेल्दै आएका हम्जा यसपटक खेल्ने हो कि होइन भन्ने अझै निश्चित भएको छैन। 

यसबारे प्रश्न गर्दा मुख्य प्रशिक्षक हाभियर काब्रेराले भने, ‘यो व्यवस्थापनको विषय हो, फेडेरेसनले हेरेको छ।’ योजना अनुसार हम्जा टिममा छन् कि छैनन् भन्ने दोहोरिएको प्रश्नमा प्रशिक्षकले भने, ‘यो टोली नेपाल भ्रमणका लागि तयार छ। यदि हम्जा आउन सकेनन् भने पनि ठूलो समस्या हुने छैन।’

तर, टिमका कप्तान तोपु बर्मनले भने हम्जा अनुपस्थित भए केही असर पर्ने संकेत गरे। ‘धेरै कुरा हामी हम्जालाई केन्द्रमा राखेर सुरु गर्छौं। उनी व्यस्त भए पनि आउन प्रयास गरिरहेका छन् भन्ने सुनेको छु। नआउने भए निश्चितै अलिकति कठिनाइ हुन्छ, तर हामी त्यसलाई पनि सामना गर्छौं,’ तोपुले प्रतिक्रिया दिए।

फिफा नियमअनुसार विन्डो अवधिमा खेलाडी बोलाइएपछि क्लबले छाड्नैपर्छ। खेलअघि कम्तीमा ४८ घण्टा अगाडि राष्ट्रिय टोलीसँग उपलब्ध गराउने दायित्व पनि क्लबकै हो।

उल्लंघन भएमा फेडेरेसनले कारबाही गर्न सक्छ। तर, बंगलादेश फुटबल फेडेरेसन (बीएफए) यसबारे केही ‘ढिलो नीति’मा चलेको देखिन्छ। 

म्यानेजर अमेर खानले भने,‘हिजो पनि यो विषयमा भनिसकेको छु। अझै छलफलकै क्रममा छ। हिजो राति पनि व्यक्तिगत रूपमा हम्जासँग कुरा भएको छ, उनी आफैं यसबारे प्रयासरत छन्।’

यसैबीच बंगलादेशले आगामी अक्टोबर ९ मा हङकङविरुद्ध एएफसी एसियन कप छनोट खेल खेल्नेछ। त्यसको तयारीस्वरूप नै नेपालसँग दुईवटा मैत्रीपूर्ण खेल तय गरिएको हो। यसबारे तोपु बर्मनले भने,‘नेपाल र हङकङको खेल्ने शैली उस्तै जस्तो छ। दुवै टोलीले लो–ब्लक डिफेन्स गर्छन्। नेपालविरुद्धको खेल हङकङ तयारीका लागि उपयोगी हुनेछ।’

सेप्टेम्बर ६ मा पहिलो खेल हुनेछ। अब पाँच दिन मात्र अभ्यास बाँकी रहे पनि तोपुले यसलाई पर्याप्त बताए। ‘हामी लामो समयदेखि सँगै खेल्दै आएका छौं। पाँच दिन पर्याप्त हुनेछ,’ तर उनले नेपालको मैदान र वातावरणबारे भने चिन्ता व्यक्त गरे,‘यहाँको मौसम र उचाइ केही समस्या हुन सक्छ। सुनेको छु दशरथ रंगशालामा एएफसीले आधिकारिक प्रतिस्पर्धा गर्न अनुमति दिएको छैन। कहाँ खेल हुन्छ भन्ने अझै प्रस्ट छैन।’

यद्यपि, एएफसीले आधिकारिक प्रतियोगिता आयोजनामा रोक लगाए पनि मैत्रीपूर्ण खेल आयोजना गर्न भने कुनै समस्या छैन। त्यसैले बंगलादेश र नेपालबीचका दुवै खेल सेप्टेम्बर ६ र ९ मा दशरथ रंगशालामै हुने निश्चित भएको छ।