नेपाललाई गोलको भारी बोकाउँदै भारतले जित्यो साफ
काठमाडौं। नेपाललाई पराजित गर्दै भारतले एक खेलअगाबै तेस्रोपल्ट साफ यु–१७ महिला च्याम्पियनसिपको उपाधि उचालेको छ।
थिम्पुस्थित चाङ्लिमिथाङ रंगशालामा शुक्रबार सम्पन्न खेलमा भारतले दोस्रो लेगमा नेपाललाई ५–० ले पराजित गरेको हो। भारतले यसअघि सन् २०१८ र ०१९ मा लगातार दुईपल्ट उपाधि जितेको थियो।
अपराजित रहेको भारतले ५ खेलबाट १५ अंक पुर्याएको छ। दोस्रो स्थानमा रहेको बंगलादेशको समान खेलबाट १० अंक छ। अब अन्तिम खेलमा भारत र बंगलादेश भिड्ने छन्। तर, उक्त खेल जिते पनि बंगलादेशले भारतलाई भेटाउने छैन।
नेपालले भने अन्तिम खेलमा भुटानलाई चुनौती प्रस्तुत गर्नेछ। नेपालको ५ खेलबाट ३ र भुटानको समान खेलबाट १ अंक छ।
भारतको जितमा पेरल फर्नान्डेज र दिव्यानी लिन्डाले समान २ गोल गरे। निरा चानुले एक गोल थपे। खेलको पाँचौं मिनेटमै निराको गोलमार्फत भारतले सुरुआती अग्रता लिएको थियो।
१५ र ४३औं मिनेटमा परेले दुई गोल गर्दा भारतले पहिलो हाफमै ३–० को आरामदायी अग्रता लियो।
७९ र दोस्रो हाफको इन्जुरी समयको दोस्रो मिनेटमा गोल गर्दै ५–० को सानदार जित दिलाए। पहिलो लेगमा भारतले नेपाललाई ७–० ले पराजित गरेको थियो।
