लिग गर्न नसकेपछि मोहन बगानले भारतीय टोलीलाई दिएन खेलाडी

काठमाडौं। भारतीय फुटबल टोलीका नयाँ मुख्य प्रशिक्षक खालिद जमिलले निकै चुनौतीपूर्ण जिम्मेवारी पाएका छन्।

अखिल भारतीय फुटबल महासंघ (एआइएफएफ) र फुटबल स्पोर्ट्स डिभलपमेन्ट लि (एफएसडिएल)बीचको विवादका कारण अहिले इन्डियन सुपर लिग (आइएसएल) स्थगित छ। त्यही वातावरणमा जमिलले राष्ट्रिय टोलीको मुख्य प्रशिक्षकको जिम्मेवारी सम्हालेका छन्।

जमिलको पहिलो परीक्षा काफा नेशन्स कप हुनेछ। तर, यस प्रतियोगितामा उनी मोहन बगान सुपर जायन्टका खेलाडीबिनै मैदान उत्रनुपर्नेछ। एआइएफएले लिग गराउन नसकेपछि मोहन बगानले आफ्ना खेलाडीलाई अन्तर्राष्ट्रिय खेलका लागि नपठाउने निर्णय गरेको हो।

भारत समूह ‘बी’ मा छ। २९ अगस्टमा ताजिकिस्तान, १ सेप्टेम्बरमा इरान तथा ४ सेप्टेम्बरमा अफगानिस्तानसँग ताजिकिस्तानकै हिसार सहरमा खेल्नुपर्ने तालिका छ।

सोमबार पत्रकार सम्मेलनमा जमिललाई बगानका खेलाडी नपाउँदा समस्या हुनेबारे प्रश्न उठाइएको थियो। उनले आत्मविश्वासपूर्वक जवाफ दिए,
‘हामीसँग भएका खेलाडीमै समायोजन गर्छौं। यसलाई चुनौतीको रूपमा लिन्छौं। मलाई कुनै कठिनाइ महसुस भएको छैन, टोलीमा पर्याप्त राम्रो खेलाडीहरू छन्।’

पत्रकार सम्मेलनमा एआइएफएफ अध्यक्ष कल्याण चौबे र उपाध्यक्ष एनए हारिस पनि उपस्थित थिए। हारिसले क्लब र महासंघबीच पारस्परिक समझदारीमा पुगेर राष्ट्रिय टोलीका लागि खेलाडी छोड्ने अभ्यास हुनुपर्ने बताए।

यस पटकको टोलीमा सुनील क्षेत्री अटाएका छैनन्। तर, जमिलले ढोका खुला रहेको भन्दै भने, ‘यी खेलपछि सुनील प्रायः उपलब्ध हुनेछन्। मैले उहाँसँग कुरा गरेको छु। फिट हुनुहुन्छ भने उनी सधैं स्वागतयोग्य छन्।’

एआइएफएफ अध्यक्ष चौबेले भने आइएसएल स्थगित हुनुले खेलाडी मात्र नभई फुटबलसँग आबद्ध हजारौं कर्मचारीको जीविकोपार्जनमा असर परेको स्वीकार गरे।

‘यो अवस्थाले खेलाडी मात्र होइन, फुटबलसँग सम्बन्धित हजारौं सहयोगी जनशक्तिको पेशामा प्रत्यक्ष प्रभाव पारेको छ। एआइएफएफ निरन्तर सरोकारवालासँग छलफलमा छ ताकि कसैको जीविकोपार्जनमा असर नपरोस्। हामी सबै मिलेर समाधान निकाल्नेछौं,’ उनले भने।

यसपछि भारतले अक्टोबरको फिफा विन्डोमा २०२७ एसियन कप छनोटअन्तर्गत सिंगापुरविरुद्ध दुई खेल खेल्नेछ। तर, यी खेलहरू बेंगलुरुमा हुन नसक्दा उपाध्यक्ष हारिसले निराशा व्यक्त गरे।

‘श्री कान्तेरावा रंगशाला सबै खेलका लागि प्रयोग हुन्छ। फुटबल खेल हुनुअघि मैदान तयार गर्न समय चाहिन्छ। यी खेलहरू अचानक बेंगलुरुलाई दिइएको थियो। अब खेल अन्यत्र सर्ने भएपछि हामी दुःखी छौं, तर यो हाम्रो नियन्त्रणमा छैन,’ हारिसले भने।

साथै, कर्नाटक राज्य फुटबल संघ (केएसएफ) का अध्यक्षसमेत रहेका हारिसले बेंगलुरुमा चाँडै नै एक उत्कृष्ट नयाँ रंगशाला बन्ने जानकारी पनि दिए।