यु–१७ महिला एसियन कप छनोट : नेपाल कठिन समूहमा

काठमाडौं। नेपाल एएफसी यु–१७ महिला एसियन कप चीन २०२६ छनोटको कठिन समूहमा परेको छ।

एसियाली फुटबल महासंघ (एएफसी) ले बिहीबार सार्वजनिक गरेको ‘ड्र’ अनुसार नेपाल समूह ‘एफ’मा परेको हो। यो समूहमा सन् २००३ को पहिलो संस्करणमा तेस्रो भएको थाइल्यान्ड र तुर्केमिस्तान छन्।

यो समूहको खेल थाइल्यान्डमा हुनेछ। नेपालले हालसम्म समूह चरण पार गर्न सकेको छैन। सहभागी २७ टोलीलाई ८ समूहमा विभाजन गरिएको थियो।

तीन समूहमा समान चार टोली छन्। अन्य पाँच समूहमा भने समान तीन टोलीलाई राखिएको छ। दक्षिण एसियाली फुटबल महासंघ (साफ)का नेपालसँग भारत र बंगलादेश मात्रै समावेश थिए। 

भारत समूह ‘जी’ र बंगलादेश समूह ‘एच’मा परेका छन्। यसअघि नै मुख्य प्रतियोगितामा साबिक विजेता उत्तर कोरियासँगै उपविजेता जापान, दक्षिण कोरिया र आयोजक चीनले स्थान बनाइसकेका छन्।