मुलर भ्यानकुभरमा अनुबन्ध

काठमाडौं। बायर्न म्युनिखका पूर्वस्टार थोमस मुलर मेजर लिग सकर (एमएलएस) क्लब भ्यानकुभर ह्वाइटक्याप्समा आबद्ध भएका छन्।

जर्मनीलाई सन् २०१४ विश्वकप जिताएका ३५ वर्षे फरवार्ड मुलर क्लब इतिहासकै सबैभन्दा ठूला साइनिङमध्ये एक मानिएका छन्।

ह्वाइटक्याप्सले उनलाई यस सिजनको बाँकी खेलका लागि ओपन रोस्टर स्पटमार्फत भित्र्याएको हो। सम्झौताको पूर्ण विवरण सार्वजनिक गरिएको छैन। तर, सन् २०२६ का लागि डिजाइनोटेड प्लेयर अप्सन राखिएको छ।

मुलरले १७ वर्षसम्म जर्मन क्लब बायर्न म्युनिखका लागि खेले। यस अवधिमा उनले १३ पटक बुन्डेसलिगासहित क्लबका लागि ३३ वटा उपाधि जिताए।

उनले क्लबका लागि सबै प्रतियोगिता समेट्दा ७५६ खेल खेल्दै २५० गोल गरेका छन्। तर, पछिल्लो सिजनपछि क्लबले उनको अनुबन्ध नवीकरण गरेन।

उनको अन्तिम खेल यसै वर्ष क्लब विश्वकपमा पेरिस सेन्ट–जर्मेनसँगको क्वार्टरफाइनलमा थियो। उक्त खेलमा बायर्न २–० ले पराजित भयो। उनी त्यो खेलमा अन्त्यतिर वैकल्पिक खेलाडीका रूपमा मैदान प्रवेश गरेका थिए।

मुलरले सन् २०१४ ब्राजिल विश्वकपमा पाँच गोल गरेका थिए। त्यस्तै, सन् २०१० दक्षिण अफ्रिका विश्वकपमा पनि पाँच गोल गर्दै गोल्डेन बुट जितेका थिए।

अन्तर्राष्ट्रिय फुटबलमा उनले १३१ खेलमा ४५ गोल गरेका छन्। गत वर्षको युरोपियन च्याम्पियनसिपपछि उनले अन्तर्राष्ट्रिय फुटबलबाट सन्न्यास लिएका हुन्।