बंगलादेशले नेदरल्यान्ड्ससँग टी–२० आई सिरिज खेल्ने

काठमाडौं। बंगलादेश राष्ट्रिय क्रिकेट टोलीले नेदरल्यान्ड्ससँग टी–२० आई सिरिज खेल्ने भएको छ।

भारतीय टोली बंगलादेश जान अस्वीकार गरेपछि बंगलादेश क्रिकेट बोर्ड (बीसीबी) ले साना टोलीसँग सिरिज खेल्ने योजना बनाएको थियो।

बीसीबी क्रिकेट अपरेसन्स अध्यक्ष नजमुल अबेदिन फहीमले अन्य ठूला टोली व्यस्त भएको कारण नेपाल र नेदरल्यान्ड्समध्ये एकसँग कुरा गर्न चाहेका थिए। तर, नेपालसँग कुरा नगरी उनले नेदरल्यान्ड्सलाई रोजेका हुन्।

नेदरल्यान्ड्सले बंगलादेशको निम्तोलाई सकारात्मक रूपमा स्वीकार गरेको छ। टोली अगस्ट १४ मा तीन खेलको टी–२० सिरिज खेल्न ढाका जाने अपेक्षा गरिएको छ, जुन अन्तिम पुष्टि हुन अझै बाँकी छ।

बीसीबीका अनुसार खेलहरू १९ देखि २५ अगस्टसम्म सञ्चालन हुनेछन्। नेदरल्यान्ड्सले बंगलादेशलाई अन्तिमपटक २०२४ को आइसीसी टी–२० विश्व कपमा चुनौती प्रस्तुत गरेको थियो। उक्त खेलमा बंगलादेश २५ रनले विजयी भएको थियो।