टेस्ट क्रिकेट खेल्ने लक्ष्यसहित अगाडि बढ्दै नेपाल

काठमाडौं। नेपालले इङ्ल्यान्डको घरेलु मैदान लर्ड्समा कहिले टेस्ट खेल्ला? यो धेरै नेपाली समर्थकको प्रश्न हो।

यही प्रश्न लिएर नेपाल क्रिकेट संघ (क्यान) का सचिव पारस खड्का अन्तर्राष्ट्रिय क्रिकेट परिषद् (आइसिसी) पुग्ने भएका छन्। पूर्वकप्तानसमेत रहेका पारस नेतृत्वको क्यानले भविष्यमा टेस्ट क्रिकेट खेल्ने लक्ष्य सार्वजनिक गरेको छ। 

यो सपनालाई जीवन्त बनाउन क्यानले आइसिसीको पूर्ण सदस्यता प्राप्त गर्न प्रयास गरिरहेको छ। हाल नेपाल आइसिसीको एसोसिएट सदस्य हो। टेस्ट क्रिकेट खेल्न पूर्ण सदस्यता प्राप्त गर्नुपर्ने हुन्छ, जुन १२ राष्ट्रसँग मात्र छ। आयरल्यान्ड र अफगानिस्तान सन् २०१७ मा पछिल्लो पटक टेस्ट राष्ट्र बनेका हुन्।

पारसले बिबिसी स्पोर्ट्ससँग नेपालमा टेस्ट क्रिकेटको तीव्र चाहना रहेको बताएका छन्। ‘नेपाल भन्नासाथ सबैलाई एभरेस्ट चढ्ने देशले सम्झना आउँछ। टेस्ट क्रिकेट हाम्रो सपना हो, तर यसमा समय लाग्छ। हामीले सबै आवश्यक खुड्किला चढ्दै जानुपर्छ। एक दिन त्यो एभरेस्ट चढ्न सक्नुपर्छ, जसको अर्थ आइसिसीको पूर्ण सदस्यता र टेस्ट खेल्ने हैसियत हो,’ उनले भने।

आइसिसीले नेपाललाई सन् १९९६ देखि एसोसिएट राष्ट्रको मान्यता दिएको हो। पूर्ण सदस्य बन्नका लागि आइसिसीले तोकेको विभिन्न मापदण्ड क्यानले पूरा गर्नुपर्छ। नेतृत्व, प्रदर्शन, सहभागिता, घरेलु संरचना, पूर्वाधार तथा विकास कार्यक्रम थुप्रै शर्त छन्।

त्यसमध्ये केही शर्त क्यानले पूरा गर्ने प्रयास गरिरहेको छ। घरेलु टी–२० फ्रेन्चाइज प्रतियोगिता नेपाल प्रिमियर लिगको दोस्रो संस्करण सुरु हुन लागेको छ। टेस्ट क्रिकेटको तयारीस्वरूप बहुदिने घरेलु रेड बल प्रतियोगिता पनि सुरु भइसकेको छ।

क्यानले महिला क्रिकेटमा पनि लगानी बढाएको छ। सेन्ट्रल कन्ट्याकमा खेलाडीलाई राखिएको छ। मैदानको पूर्वाधार निर्माण तथा स्तरोन्नतिका लागि सरकारी बजेटसमेत प्राप्त गरेको छ।

आगामी जुलाई १७ देखि २० सम्म सिंगापुरमा हुने आइसिसीको वार्षिक महासभामा क्यानले अनौपचारिक रूपमा आफ्नो योजना सुनाउने लक्ष्य बनाएको छ।

‘कार्डियाक किड्स’
कीर्तिपुरस्थित त्रिवि क्रिकेट मैदानमा हुने नेपालका खेलहरूले सधैं ठूलो संख्यामा दर्शक तान्ने गर्छ।

नेपाल गत वर्षको टी–२० विश्वकपमा छनोट भएको थियो। १० वर्षपछि उक्त मञ्चमा फर्किएको नेपाल दक्षिण अफ्रिकासँग प्रतिस्पर्धा गर्दा १ रनले पराजित भएको थियो। दक्षिण अफ्रिका त्यो टोली हो, जसले फाइनल खेल्यो।

नयाँ प्रशिक्षक स्टुअर्ट लको नेतृत्वमा नेपाल आगामी २०२६ को टी–२० विश्वकप र २०२७ को ५० ओभर विश्वकपमा पनि सहभागी हुने प्रयासमा छ। हाल नेपाली टोली ग्लासगोमा स्कटल्यान्ड र नेदरल्यान्ड्ससँग टी–२० त्रिकोणात्मक सिरिज खेलिरहेका छ।

क्रिकेट विश्वपकप लिग २ को अन्तर्गत डन्डीमा स्कटल्यान्ड र नेदरल्यान्ड्ससँग भएका नाटकीय खेल प्रदर्शनले नेपालको ‘कार्डियाक किड्स’ उपनामलाई अझ पुष्टि गरेको छ।

नेपालका कप्तान रोहित पौडेलले बीबीसी स्पोर्टसँग भने,‘पछिल्ला करिब १० वर्षदेखि हाम्रो क्रिकेट यस्तो छ, जहाँ प्रत्येक खेल अन्तिम बलसम्म पुग्छ। कार्डियाक किड्स भनेर हामीलाई किन भनिन्छ भने कहिलेकाँही असहज अवस्थामा पनि जित्ने मौका खोज्न हामी अन्तिमसम्म लड्छौं।’

उनले थपे,‘२०१६ मा नेपालले एमसीसीसँग लर्ड्समा खेल्दा जितेको थियो। यदि हामी एकदिन त्यहीँ इङ्ल्यान्डसँग टेस्ट खेल्न सक्यौं भने त्यो हाम्रो लागि मात्र होइन, देशका लागि गर्वको कुरा हुनेछ।’