काठमाडौं। योएनने विस्साको लेट इक्क्वलाइजर गोलसँगै आर्सनलको इङ्लिस प्रिमियर लिगको उपाधि जित्ने सम्भावना लगभग समाप्त भएको छ।
घरेलु मैदान एमिरेट्स स्टेडियममा शनिबार सम्पन्न खेलमा विस्साको अन्तिमतिरको गोलसँगै ब्रेन्टफोर्डसँग आर्सनल १–१ को बराबरीमा रोकिएको हो। थोमस पार्टेले दोस्रो हाफमा अर्सनललाई अग्रता दिलाएका थिए।
तर, विस्साले ७४औं मिनेटमा बराबरी गोल गर्दै खेलको नतिजा उल्टाए। यो नतिजासँगै आर्सनल शीर्ष स्थानमा रहेको लिभरपुलभन्दा १० अंकले पछि परेको छ, जसले आइतबार वेस्ट ह्यामसँग खेल्नेछ।
लिभरपुलले अब बाँकी सात खेलबाट केवल नौ अंक हासिल गरे प्रिमियर लिगको उपाधि जित्नेछ। यो सन् २०२० पछिको पहिलो र कुल २०औं उपाधि हुनेछ।
गत मंगलबार रियल मड्रिडविरुद्ध च्याम्पियन्स लिगको पहिलो लेगमा ३–० को प्रभावशाली जित निकालेपछि उच्च आत्मबलमा हासिल गरेको आर्सनलले त्यस लय कायम राख्न सकेन।
प्रशिक्षक मिकेल आर्टेटाले रियलसँगको दोस्रो लेगलाई ध्यानमा राख्दै बुकायो साका, मार्टिन ओडेगार्ड, मिकेल मेरिनो, जुरियन टिम्बर र माइल्स लुइस–स्केलीलाई विश्राम दिएका थिए। खेलको सुरुआतमै गेब्रिएल मार्टिनेलीले गोल गर्ने प्रयास गरे। तर, ब्रेन्टफोर्डका गोलकिपर मार्क फलेकनले उत्कृष्ट बचाउ गरे।
२६औं मिनेटमा किरण टियरनीले हेडरमार्फत गरेको गोललाई प्रिमियर लिगमा पहिलोपटक प्रयोग गरिएको सेमी–अटोमेटेड अफसाइड सिस्टमले अस्वीकृत गर्यो।
डेक्लान राइस र लिआन्द्रो ट्रोसार्डका प्रयास पनि गोलकिपर फलेकनले रोक्दै पहिलो हाफ बराबरीमा समाप्त गरे।
६१औं मिनेटमा डेविड रायाले कर्नर समातेर बल राइसलाई पास गरे। डिफेन्स पार गर्दै बल थोमस पार्टीलाई पास गरे र उनले बल जाली चुमाए।
जित सुनिश्चित गर्न आर्टेटाले साका, ओडेगार्ड र लुइस–स्केलीलाई मैदानमा उतारे। तर, ब्रेन्टफोर्डले ७४औं मिनेटमा नाथन कोलिन्सको हेडर र मिकाएल कायोडेको क्रसको फाइदा उठाउँदै विस्साले गोल गरे।
साकाले खेल अन्त्यतिर गोल गर्ने राम्रो मौका पाएका थिए। तर, उनको प्रहार कमजोर रह्यो। त्यसपछि उनले स्टपेज टाइममा अर्को प्रयास गरे। तर, बल पोस्टको छेउबाट बाहिरियो। अन्तिम केही मिनेट आर्सनलले जोर्गिन्होको चोटका कारण १० खेलाडीमा खेल्नुपरेको थियो।
