इलाम। पाँचौ सन्दकपुर गोल्डकपको उपाधिको लागि बुट्टाबारी युनाइटेड एफसी झापा र ब्रदरहुड एफसी उदयपुर भिड्ने भएका छन्।
शनिबार सम्पन्न दोस्रो सेमिफाइनलमा रेडहर्स एफसी इलामलाई २–० ले हराउँदै बुट्टाबारीले ब्रदरहुडससँगको उपाधि भेट पक्का गरेको हो। इलामसँग बुट्टाबारीको भेट यो छैटौं हो। यसअघि तीन पटकको खेल बुट्टाबारीले आफ्नो पक्षमा पारेको थियो।
शुक्रबार भएको पहिलो सेमिफाइनलमा ब्रदरहुडले डिफेन्डिङ च्याम्पियन डाँगीहाट फुटबल क्लब मोरङलाई हराउँदै फाइनलमा स्थान सुरक्षित गरिसकेको छ। बुट्टाबारीका लागि दुवै गोल सागर रसाइलीले गरे। उनी प्लेयर अफ द म्याच बन्दै नगद दुई हजार पाँच सय प्राप्त गरे।
सन्दकपुर गोल्डकपका बुट्टाबारी दोस्रो पटक फाइनल प्रवेश गरेको हो। यसअघि गत संस्करणमा डाँगीहाट एफसीसँग फाइनलमा पराजित बन्दै उपविजेतामा सीमित भएको थियो।
देउराली स्पोर्टिङ क्लब सन्दकपुरले आयोजना गरेको गोल्डकपको विजेताले नगद २ लाख ५५ हजार र उपविजेता बन्ने टिमले नगद १ लाख ५५ हजार रुपैयाँ प्राप्त गर्नेछन्।
