ललितपुर प्लेअफमा, बाहिरियो बुटवल

काठमाडौं। बुटवल लुम्बिनी एफसीलाई पराजित गर्दै साबिक विजेता ललितपुर सिटी एफसी नेपाल सुपर लिग (एनएसएल) को तेस्रो संस्करणको प्लेअफमा पुग्ने पहिलो टोली बनेको छ।

त्रिपुरेश्वरस्थित दशरथ रंगशालामा शनिबार सम्पन्न दिनको दोस्रो खेलमा बुटवलमाथि ललितपुरले २–० को सहज जित निकालेको हो। यो नतिजासँगै शीर्ष स्थानको ललितपुरले पाँच खेलबाट ११ अंक पुर्‍याएको छ। 

बुटवल भने एक खेलअगाबै प्रतियोगिताबाट बाहिरिएको छ। बुटवल पाँच खेलबाट एक अंक बटुल्दै पुछारमा छ। बुटवलले अन्तिम खेल बिहीबार पोखरा थन्डर्ससँग खेल्नेछ। 

ललितपुरको जितमा कप्तान अनन्त तामाङ र सन्तोष खत्रीले गोल गरे। २३औं मिनेटमै ललितपुरले अनन्तको सेटपीस गोलमार्फत सुरुआती अग्रता लियो। मणिकुमार लामाले दोस्रो बारतर्फ प्रहार गरेको कर्नर बललाई अनन्तले फ्रि हेडरमार्फत गोलमा परिणत गरेका हुन्। जारी लिगमा यो उनको पहिलो गोल हो। 

त्यसपछि ललितपुरलाई अर्को गोल थप्न भने लामो समय कुर्नुपर्‍यो। निर्धारित खेल सकिन दुई मिनेट बाँकी रहँदा सन्तोषले गोल गरे।

इमो इजिकेलले दिएको बललाई सन्तोषले बक्स लाइनजिकबाट फितलो प्रहार गरेका थिए। तर, बुटवलका गोलकिपर दीप कार्कीले आफ्नो डिफेन्डरमाथि भर पर्दा गोल खान पुगे।