ब्रुएनाको सानदार प्रदर्शन, सिटीको च्याम्पियन्स लिगको आशा पुनः जाग्यो

काठमाडौं। केविन डि ब्रुएनाको सानदार प्रदर्शनसँगै म्यानचेस्टर सिटीले च्याम्पियन्स लिगको आशा पुनः बलियो बनाएको छ।

शनिबार क्रिस्टल प्यालेसविरुद्धको खेलमा दुई गोलले पछि परेको अवस्थामा सानदार पुनरागमन गर्दै सिटीले ५–२ को जित हात पारेको हो। ३३ वर्षीय डि ब्रुएनाले ३३औं मिनेटमा गोल गरेका थिए।

उनले फ्रिकिकमार्फत प्रहार गरेको बल पोस्टमा ठोक्किएर गोलमा परिणत भएको थियो। उनले पहिलो हाफमै ओमार मारमाउश र मातेओ कोभाचिचका गोलमा पनि भूमिका खेले।

जेम्स म्याकअटीले गोलकिपर एडरसनको पासबाट चौथो गोल थपे, जुनपछि उनी चोटग्रस्त भएर मैदान बाहिरिए। त्यसपछि एकेडेमीबाट आएका अर्को युवा खेलाडी निको ओ’राइलीले पाँचौं गोल गर्दै सिटीको जित सुनिश्चित गरे।

यो खेल डि ब्रुएनाको क्लासको प्रमाण बन्यो। उनले गत हप्ता मात्रै सिजनको अन्त्यपछि सिटीबाट बिदा हुने घोषणा गरेका थिए। चोटका कारण पछिल्लो केही सिजनमा उनको प्रभाव कम भए पनि कौशल अझै झल्किरहेकै छ। कोभाचिचलाई गराएको गोल पास डि ब्रुएनाको प्रिमियर लिगमा ११९औं असिस्ट हो।

प्यालेसको सुरुआती अग्रता
खेलको सुरुआती २१ मिनेटमै एबेरेची एजे र क्रिस रिचार्ड्सले गोल गर्दै सिटीलाई झस्काएका थिए। तर, त्यसपछि सिटीले पाँच गोल गर्दै सानदार पुनरागमन गर्‍यो। यस जितसँगै सिटी चौंथो स्थानमा उक्लिएको छ र चेल्सी तथा न्युक्यासलभन्दा माथि पुगेको छ।

यद्यपि, यी दुई टोलीले एक खेल कम खेलेका छन्। सिटी अहिले तेस्रो स्थानको नटिङ्घम फरेस्टभन्दा मात्र दुई अंकले पछाडि छ, जसले शनिबार एभर्टनसँग खेल्नेछ।