काठमाडौं। महासचिव रहेका निलेन्द्रराज श्रेष्ठले हालै सम्पन्न भनिएको नेपाल ओलम्पिक कमिटी (एनओसी)को निर्वाचन प्रक्रियामा गम्भीर त्रुटि रहेको बताएका छन्।
ओलम्पिक कमिटी अफ एसिया (ओसिए) का प्रतिनिधिसहितको कुवेत बैठकमा श्रेष्ठले ओलम्पिकको निर्वाचन प्रक्रियामा धेरै त्रुटि रहेको बताएका हुन्।
एनओसी विवादमा समाधान खोज्न अन्तर्राष्ट्रिय ओलम्पिक कमिटी (आइओसी) ले ओसिएलाई जिम्मेवारी दिएको थियो। ओसिएले अदालतमा मुद्दा दायर गरेका पाँच संघका प्रतिनिधि र महासचिव रहेका श्रेष्ठलाई कतारमा बोलाएका मंगलबार छलफल गरेको हो।
‘आइओसी र ओसिएको चार्टरविपरीत अलोकतान्त्रिक प्रक्रियाबाट एनओसीको चुनाव गरिएको छ। सुरुदेखि नै चुनावी प्रक्रियामा धेरै त्रुटि छ,’ बैठकमा श्रेष्ठले राखेको भनाइ उद्धृत गर्दै एक सहभागीले भने, ‘उच्च अदालत र सर्वोच्च अदालतबाट आएको आदेशलाई उल्लंघन गर्न सकिँदैन भन्दाभन्दै पनि अलोकतान्त्रिक तरिकाले चुनाव भएको छ।’
अदालतको आदेशअनुसार चुनाव गराउन नमिल्ने सूचना भए पनि जबरजस्ती एनओसीको निर्वाचन गरिएको जानकारी उनले ओसिएका प्रतिनिधिलाई गराएका थिए।
बैठकमा सहभागीहरूको भनाइ रेकर्ड गरिएको र सोही अनुसारको रिपोर्ट ओसिएले आइओसीमा बुझाउने तय भएको बैठकमा सहभागी एक पदाधिकारीले खेलपाटीलाई बताए। ओसिएले बुझाएको रिपोर्टका आधारमा आइओसीले निर्णय लिने बताइएको छ।
बैठकमा सहभागी हुन श्रेष्ठसहित अदालतमा मुद्दा दायर गरेका पाँच संघका अध्यक्षहरू कुवेत गएका छन्। ओसिएले छलफलका लागि ती संघका प्रतिनिधिलाई कुवेत बोलाएको हो।
