काठमाडौं। पहिलो जितको खोजीमा रहेको नेपाललाई घरेलु टोली युगान्डाले वुमन्स डे टी–२० अन्तर्राष्ट्रिय क्रिकेट प्रतियोगिताको दोस्रो खेलमा ७६ रनको लक्ष्य दिएको छ।
एन्टेब्बे क्रिकेट ओभलमा पहिला ब्याटिङ थालेको युगान्डाले निर्धारित २० ओभरमा सात विकेट गुमाउँदै ७६ रन बनाएको हो।
युगान्डाकी इम्याक्युलेट नकिसुयीले सर्वाधिक २२ रन बनाइन्। ४० बल खेलेका उनले तीन चौका प्रहार गरिन्। स्टेफनी नाम्पीना १४ र मालिसा अरिओकोटले ११ रन बनाउँदा अन्यले राम्रो प्रदर्शन गर्न सकेनन्।
नेपालकी पूजा महतोले तीन र कप्तान इन्दु बर्माले दुई विकेट लिइन्।
नेपाल पहिलो खेलमानामिबियासँग ६ विकेटले पराजित भएको थियो। नेपालका तीन ब्याटरबाहेक अन्यले दोहोरो अंकमा रन बटुल्न सकेका थिएनन्। त्यसैले नेपाल ९२ रनमै समेटिएको थियो।
युगान्डा भने लगातार दोस्रो जितको लक्ष्यमा छ। युगान्डाले पहिलो खेलमा हङकङलाई आठ विकेटले पराजित गर्दै विजयी सुरुआत गरेको थियो।
नेपालले र युगान्डाले यसअघि पाँच खेल खेलेका छन्। सन् २०२२ मा कीर्तिपुरस्थित त्रिवि क्रिकेट मैदानमा भएको पाँच खेलको सिरिज युगान्डाले ३–२ ले जितेको थियो। त्यसयता यी दुई टोली पहिलोपल्ट भिड्न लागेका हुन्।
