काठमाडौं। कप्तान स्टिभ स्मिथ र एलेक्स क्यारीको अर्धशतकसँगै अस्ट्रेलियाले भारतलाई आइसिसी च्याम्पियन ट्रफीको फाइनलमा पुग्न २६५ रनको लक्ष्य दिएको छ।
दुबई अन्तर्राष्ट्रिय क्रिकेट स्टेडियममा टस जितेर पहिला ब्याटिङ थालेको अस्ट्रेलियाले निर्धारित ५० ओभर सकिन तीन बल बाँकी रहँदा सबै विकेट गुमाउँदै २६४ रन बनाएको हो।
अस्ट्रेलियाले तेस्रो ओभरको अन्तिम बलमै ओपनर कुपर कोनलीलाई शून्य रनमा गुमाएको थियो। तर, अर्का ओपनर ट्राभिस हेड र कप्तान स्टिभ स्मिथले अर्धशतकीय साझेदारी गर्दै अस्ट्रेलियालाई खेलमा पुनरागमन गराए।
हेड नवौं ओभरको दोस्रो बलमा ३९ रनमा सुभनम गिलबाट क्याच आउट भए। उनले ३३ बलमा पाँच चौका र दुई छक्का प्रहार गरे। त्यसपछि स्मिथले मार्नस लाबुशेनसँग पनि अर्को अर्धशतकीय साझेदारी गरे।
लाबुशेन २९ रनमा रविन्द्र जडेजाबाट एलबिडब्युको सिकार भए। जोश इङ्लिस ११, ग्लेन मैक्सवेल सात र बेन ड्वारश्विस १९ रनमा आउट हुँदा एलेक्स क्यारीले ५७ बलमा आठ चौका र एक छक्कासहित ६० रनको इनिङ्स खेले।
उनको ओडिआइमा यो १२औं अर्धशतक हो। भारतका मोहम्मद शमी, वरुण चक्रवर्ती र रवीन्द्र जडेजाले समान दुई विकेट लिए। अक्षर पटेलको नाममा एक विकेट रह्यो।
