काठमाडौं। काठमाडौंलाई पराजित गर्दै मकवानपुर बागमती प्रदेश पुरुष प्रधानमन्त्री कप छनोटको फाइनलमा प्रवेश गरेको छ।
मंगलबार सम्पन्न दोस्रो सेमिफाइनलमा मकवानपुर तीन विकेटले विजयी भएको हो। योसँगै मकवानपुरले उपाधिका लागि ललितपुरसँग खेल्ने छ।
ललितपुरले पहिलो सेमिफाइनलमा चितवनलाई तीन विकेटले पराजित गर्दै फाइनलमा स्थान सुरक्षित गरिसकेको छ। काठमाडौंले प्रस्तुत गरेको २३२ रनको लक्ष्य मकवानपुरले ४१ ओभरमा सात विकेट गुमाउँदै पूरा गरेको हो।
मकवानपुरका शुभ कंसकारले सर्वाधिक ७३ रन बनाए। सुमन सुनार ५१ र सक्षम बस्ताकोटी ३८ रनमा आउट भए।काठमाडौंका सोनु देवकोटा र प्रतीश जिसीले समान दुई विकेट लिए। उपेन्द्र खत्रीको नाममा एक विकेट रह्यो।
त्यसअघि माथिल्लो मूलपानी क्रिकेट मैदानमा पहिला ब्याटिङ थालेको काठमाडौंले ४७ ओभरमा सबै विकेट गुमाउँदै २३१ रनको योगफल तयार पारेको थियो।
काठमाडौंका पृथु बास्कोटाले सर्वाधिक ५३ रन बनाए। सोनु देवकोटा ५२ र ऋत गौतम ४५ रनमा आउट भए। मकवानपुरका रिजन ढकालले सर्वाधिक तीन विकेट लिए। साकार गजुरेल र असीम श्रेष्ठको नाममा समान दुई विकेट रह्यो।
