काठमाडौं। भारतीय टोलीका स्टार ब्याट्सम्यान विराट कोहली क्रिकेट मैदानमा आफ्नो आक्रामकताका लागि परिचित छन्।
ब्याटिङबाहेक कोहली प्रायः फिल्डिङ गर्दा पनि अत्यधिक उत्साहित हुन्छन्। सामाजिक सञ्जालमा धेरै ‘मिम्स’ बनेका छन्, जसमा बलरले विकेट लिँदा उनी बलरभन्दा बढी उत्साहित भएका छन्।
कोहली हाल च्याम्पियन्स ट्रफी खेलिरहेका छन्। उनले आफू मैदानमा किन यति उत्साहित हुन्छन् भन्ने कुराको जवाफ दिएका छन्।
आइसिसीले आफ्नो सामाजिक सञ्जालमा एउटा भिडियो सेयर गरेको छ। उक्त भिडियोमा कोहलीलाई सोधिएको थियो– विकेट झर्दा बलरभन्दा बढी किन तपाईं उत्साहपूर्वक खुशियाली मनाउनु हुन्छ?
यसबारे कोहलीले भने, ‘टिम गेममा तपाईंले अन्य १० खेलाडीहरूसँग मिलेर कडा परिश्रम गर्नुपर्छ। हामीलाई जिताउन मद्दत गर्ने खेलाडीसँग म हरेक क्षणको आनन्द लिन र उत्सव मनाउन चाहन्छु।’
च्याम्पियन्स ट्रफीमा भारतीय टोलीको यात्रा अहिलेसम्म उत्कृष्ट छ। यो टोलीले समूह चरणमा आफ्ना तीनवटै खेल जितेर सेमिफाइनलको लागि छनोट भएको छ।
भारतले अब मंगलबार सेमिफाइनलमा एकदिवसीय विश्वकप च्याम्पियन अस्ट्रेलियाको सामना गर्नेछ।
