महासचिवको रुपमा निलेन्द्रलाई ओलम्पिक एसियाको निमन्त्रणा 

काठमाडौं । निलेन्द्रराज श्रेष्ठलाई महासचिवको रुपमा सम्बोधन गर्दै ओलम्पिक काउन्सिल अफ एसिया (ओसिए)ले निमन्त्रणा पठाएको छ ।

नेपाल ओलम्पिक कमिटीमा देखिएको विवाद समाधानका लागि प्रयास सुरु गरेको ओसिएले निलेन्द्रलाई महासचिवको रुपमा सम्बोधन सहित छलफलमा बोलाएको हो । 

सोमबार आईपुगेको पछिल्लो पत्रले नेपाल ओलम्पिक कमिटी (एनओसी)को निर्वाचनलाई अन्तराष्ट्रिय ओलम्पिक कमिटी (आईओसी) र ओसिएले मान्यता नदिएको थप प्रस्ट भएको छ । अवैधानिक निर्वाचनबाट आएको कमिटीले आफुहरुलाई अन्तराष्ट्रिय मान्यता र समर्थनको दाबी गर्दै आएको थियो । आईओसी र ओसिएले नेपाल ओलम्पिकको पुरानै कमिटीको हैसियतमा विवाद समाधानको प्रयासलाई अघि बढाएको हो । 

चीनमा भएको विन्टर ओलम्पिकको दौरान जीवनराम श्रेष्ठले आईओसी र ओसिएलाई आफ्नो निर्वाचनलाई मान्यता दिन लबिङ गरेका थिए । जीवनरामको निर्वाचनलाई मान्यता दिन अस्विकार गरेको आईओसीले नेपाल ओलम्पिकमा आबद्ध संघहरुलाई पत्र लेख्दै विवाद समाधानका लागि छलफल अघि बढाउन ओसिएलाई जिम्मेवारी दिएको जानकारी गराएको थियो ।

त्यसकै पहल स्वरुप ओसिएका डिरेक्टर जनरल हुसेन अल मुसलमले निलेन्द्रराज श्रेष्ठलाई महासचिवको रुपमा सम्बोधन गर्दै छलफलका लागि बोलाएका छन् । मुसलमले निलेन्द्र सहित नेपाल ओलम्पिक कमिटीविरुद्ध मुद्धा हाल्ने ५ खेल संघका अध्यक्षलाई समेत पत्र लेख्दै छलफलका लागि कुवेतमा आउन आग्रह गरेका छन् । 

विवाद समाधानका लागि ओसिएलाई अघि सार्ने आईओसीको निर्णयप्रति ओलम्पिकमा आबद्ध अधिकांश संघ असन्तुष्ट छन् । जीवनराम श्रेष्ठको नेतृत्वविरुद्ध संघर्ष गरिरहेका असन्तुष्ट संघहरुले उनी बोर्ड सदस्य रहेको ओसिएले विवादलाई निष्कर्शमा पुर्याउन नसक्ने भन्दै असन्तुष्टि ब्यक्त गरिरहेका छन् । ओसिएलाई विवाद मिलाउने जिम्मेवारी दिदाँ स्वार्थ बाँझिने भन्दै आईओसीबाटै विवाद समाधानका लागि पहल हुनुपर्ने असन्तुष्ट खेल संघहरुको अडान छ । 

अदालत, सरकार र अन्तराष्ट्रिय ओलम्पिक कमिटीलाई अटेर गर्दै जीवनरामले नेपाल ओलम्पिक कमिटीको निर्वाचन गराएका थिए । सरकारले ओलम्पिक कमिटी सहित निर्वाचनमा सहभागी हुने संघ तथा पदाधिकारीलाई कारबाहीको तयारी गरेको छ । निर्णय कार्यान्वयनमा सरकारले तदारुपता नदेखाउँदा ओलम्पिक विवाद अझ बढी लम्बिने र गिजोलिने संकेत देखिएको छ ।